Aalisarnermi 2008-mut TAC aalajangersarneqarpoq
Naalakkersuisut 2007-imi decembarip 20-iani aalisakkanut ataasiakkaanut killilersukkanut TAC aalajangersarpaat, saarulliit suluppaakkallu (pelagisk) kisiisa pinnagit.
Raajanut tunngatillugu 2008-mut raajartassiissutissatut biologit innersuussutaat ukiuni kingullerni simananit pisassiissutaasarsimasunit minnerupput. Biolog-it taamaalillutik innersuussutigaat raajartassat tamarmiusut amerlanerpaamik 110.000 tonsiussasut.
Kisianni Naalakkersuisut aalajangerpaat, Kalaallit Nunaata Kitaani TAC-kut pisassiissutit 127.300 tonsiussasut akuersissutigineqassasut. 127.300 tonsit taakku imatut agguataarneqarput; 123.300 tonsit kalaallit raajarniartuinut, taakunannga 70.281 tonsit avataasiorluni raajarniartunut tunniunneqarlutik, 53.019 tonsit sinerissamut qanittumi raajarnianut. Sinneruttut 4.000 tonsit EU-mut pisassiissutigineqarput - Kalaallit Nunaata EU-llu akornanni isumaqatigiissutit naapertorlugit.
Qulaani taaneqartut 2007-imi TAC-mut 134.000 tonsiusimasumut sanilliullugu 5%-imik appariarpoq.
Kalaallit Nunaata kangiani raajartassanut TAC 12.400 tonsinut aalajangerneqarpoq, 2007-imut sanilliullugu allanngornani. Taakku imatut agguarneqarput; 5.400 tonsit kalaallit avataasiorlutik raajarniartuinut aamma 7.000 tonsit EU-mut.
Sinerissamut qanittumi qaleralinniarneq annermik Upernaviup, Uummannap Qeqertarsuullu Tunuani annermik ingerlanneqartarpoq. Uummannamut Qeqertarsuullu tunuanut biologinit pisassiissutissasut innersuussuteqarpoq, Upernavimmut naamik. Uummannami pisassiissutissatut innersuussutigineqarput qalerallit katillugit 5.000 tonsit. Qeqertarsuup Tunuanut tunngatillugu pisassat amerlineqannginnissaat kaammattuutaavoq.
Naalakkersuisut ukioq manna sinerissamut qanittumi qaleralinniarnissamut pisassiinissaq aalajangerpaat, taamalu 2008-mi qaleralittassiissutit TAC ataani allassimasut aalajangiullugit:
Qalerallit, sinerissamut qanittumi
| Pisassiiffiit: | tons |
| Qeqertarsuup Tunua | 12.500 |
| Uummannaq | 5.000 |
| Upernavik | 5.500 |
| Kalaalit Nunaata sinnera | killeqanngitsumik |
Saattuat
2008-mi sinerissamut qanittumi saattuanik pisassiissutit (TAC) tamarmiusut 4.500 tonsiusut imatut agguataarneqarput:
| Nakkutilliiviit | Avataasiortut | Sinerissamut qanittumi | 2007-mi pisassiissutit | 2007-mi pisat(14.dec. nall.) | 2008-mut pisassiissutit |
| Upernavik | Ammasoq | Ammasoq | 100 | 0 | 100 |
| Disko – Uummannaq | Ammasoq | Ammasoq | 1.530 | 659 | 1.400 |
| Sisimiut | Ammasoq* | Ammasoq | 850 | 650 | 800 |
| Maniitsoq - Kangamiut | Ammasoq* | Ammasoq | 300 | 181 | 300 |
| Nuuk - Paamiut | Ammasoq | Ammasoq | 1.600 | 450 | 1.400 |
| Narsaq - Qaqortoq | Ammasoq | Ammasoq | 0 | 0 | 0 |
| Katillugit | 4.380 | 1.940 | 4.000 |
* Saattuarniarfiit taakku 2008-mi ammarneqassapput.
2007-imisulli kalaallinut saattuarniartunut avataasiortunut saattuartassanik ammaassisoqanngilaq.
EU EU-mik 2008-mut isumaqatigiissut naapertorlugu EU avataani 500 tonsinik pisassinneqarpoq.
Saattuat qituttunik qaleruallit pisarinissaat minnerpaatinniarlugu inuussutissarsiortut nammineq saattuarniarnerup matunissaa isumaqatigiissutigissavaat.