Naalakkersuisut takornariaqarneq aallulluarlerniarpaat
Naalakkersuisut kissaatigaat, takornariaqarnerup inuiaqatigiit aningaasarsiornerannut sunniutai ukiunut tulliuttunut annertusaavigineqassasut.
Naalakkersuisut nuna tamakkerlugu takornariartitsinermi iliuusissaq 2008-mit 2010-mut atuuttussaq akuereqqammerpaat. Naalakkersuisut kissaatigaat, takornariaqarnerup inuiaqatigiit aningaasarsiornerannut sunniutai ukiunut tulliuttunut annertusaavigineqassasut kiisalu Kalaallit Nunaata aningaasarsiornerani inuussutissarsiutit pingaarnerit akornanni imminut napatissinnaanerulissasoq.
Takornariaqarnermi iliuusissaq immikkoortunut arfinilinnut agguataarneqarpoq:
" Atassuteqaatersuutit
" Piginnaanngorsaaneq suliffeqartitsinermilu pissutsit
" Tunisassianik inerisaaneq
" Avammut nittarsaaneq
" Aaqqissuussineq
" Aaqqissugaanikkut alaatsinaanneq misissueqqissaarnerlu
Iliuusissat ilaanni tamani killiffik naatsumik allaaserineqarpoq, tamatumalu kingorna immikkoortumi unamminartut pingaarnerit allaaserineqarlutik. Tamatuma saniatigut anguniakkat ilai aalajangersimasut saqqummiunneqarput, suliniutinik arlalinnik aalajangersimasunik piffissami iliuuseqarfiusussap iluani naammassineqartussatut ilimagisanik malitseqartillugit.
Naalakkersuisut iliuusissap eqqukkiartuaarneqarnerani suleqataasussat tamaasa suleqatigilluarnissaat neriuutigaat.