Kujataanit juullimut allakkat kinguaattoortut

Allakkat timmisartukkoortut Kujataaneersut juullertinnagu Danmarkimut apuutissanngillat.

Kujataanit allakkat timmisartukkoortut juullertinnagu Danmarkimut apuutinngitsoortussanngorput. Tamatumunnga pissutaavoq Narsarsuarmut/Narsarsuarmit Danmarkimut timmisartorsuup ajoraluartumik decemberip 19-ianni 20-iannilu aallarnissaa taamaatiinnarneqarsimammat.

Naatsorsuutigineqarpoq timmisartorneq ingerlanneqassasoq ullumikkut tallimanngornermi, Post Greenlandillu neriuutigaa allakkat Danmarkimut apuuttut juulliarartinnagu inuttassaminnut apuukkumaartut. Kujataani TELE-POST centeret arlallit arfininngornermi allakkat immikkoortitissavai killilimmillu ammalluni.

– Post Danmarkip ajoraluartumik nalunaarutigaa ullumikkut tallimanngornermi Narsarsuarmut aallartumut allakkanut taamaallaat 1135 kiilunut inissaqartoq allakkallu 605 kiilut qimanneqartut. Post Danmarkip nalunaarutigaa naatsorsuutigineqartoq allakkat qimanneqartut aatsaat Kujataanut nassiunneqassasut 2008-mi januarip aappaanni, Post Greenland tusagassiorfitsigut nalunaarummini allappoq.

Powered by Labrador CMS