Fogh-ip inuppalaarfii
Statsminister Anders Fogh Rasmussenip inuppalaassutitut amigaatigisanik quiasraatigigamigit Kalaallit Nunaat eqqaavaa.
Innuttaasut amerlanerpaatigut arajutsisaraluaraat Fogh tupinnaannartumik ikkarissumik quisaarniuteqarpoq. Tamanna katerisimaarnerni matoqqasuniitillugu annermik ersertarpoq. Ukioq manna tusagassiornermik suliaqartut nereqatigiinnerata nalaani oqalugiarnermini Foghip assersuutigalugu inuppalaarnissamik piginnaasalittut amigaateqarnini quiasaarutigaa. Taamaaliorpoq SF-ip siulittaasua Villy Søvndal sinngagalugu, Ekstrabladet allappoq.
– Avatangiisinut mianerinnittuunera takutiniarlugu ataasiaannarnanga - marloriarlungamali - Kalaallit Nunaannut angalasariaqarsimavunga, puisip amianik jakkilerlunga iluliarsuup aakkiartortup saavani issilisinniaannarlunga. Villy-li qanoq iliorpa? Biilersuarni Rover-i benzinamik iioraanginnavissoq tuniniarpaa. Taamak iluatsitsiarpaa, Fogh oqarpoq.
Ukioq manna oqalugiarnermi allami aaqqissuisut peqatigiiffiata Tivolimiinnerani peqataasut ilaata eqqaamavaa, Foghip kukkugaangami nassuerutiginninnissani pikoriffigivallaanngikkaa pillugu quianartunngortitsisoq.
– Bjarne Riis-itulli oqarsinnaanngilanga epo-torsimallunga, imaluunniit Team Easy On-itut gas-imik naamaartarlungalu dope-itorsuaarnikuullunga. Kisianni suut tamaasa qaqilissallugit piffissanngorpoq. Kukkussuteqartarpunga. Kukkussuterpassuaqartarpunga. Kisianni aamma oqarusuppunga; tassa malersoqqittariaqanngilaq. Massakkut siumut isiginiarta, Fogh oqarpoq.