Kangerluarsunnguami juulli
Utoqqarmiut Kangerluarsunnguanni nukissiorfik ilaqutariinnik Nuummiunik juullisiorianik tikeraarteqarpoq.
Paulus Hard nukissiorfimmi sulisuuvoq, ukioq mannalu juullikkunni sulisussaagami angerlarsinnaanngimmat ilaqutaasa ornillugu juullisioqatigaat. Juullisiornertik nunatsinni atuartartunut ima oqaluttuaraat:
Ilaqutariit Johnsen-Hardikkut juullisioriarnerat:
Paarma ulloq 24. december 3-nik ukioqalerluni inuuissiorpoq nunap timaannarsuani nuanneqisumi. Juulliararsiorpugut silagissuaq nipaassuaq alianaak. Angutitagut aqisserput ukalerlutillu!
Unnukkut nipaassuaq, igalaap silataani sumi tamaani ukallit terianniaaqqallu, ila isigisat tupinnarlutillu nuanneqaat. Misigisaq allarluinnaq illoqqarfissuarmiit.
Unnugu nerrisissaagut mamartunik, kingorna natermut nallakaariarluta aanaap atuffatissavaatigut juullip evangiiliuanik. Aamma atuakkanik nuannersunik qiiammisaarnartunik imalinnik nassaratta taakkuninnga atuffatissavaatigut.
Tamatta timikkut tarnikkullu pissarseqaagut asulu silaannaq peqqinartoq najuusorlugu uluannguagut appilleruloorlutik peqqissutsip ersiutaanik.
Tamassi eqqaamallusi juullimi pilluaritsi
Paarma, Mark, Maria, Malik, Najâraq, Paalu aanaa Bikkilu