Juullisiorfissaqanngitsunut juulli
Angerlarsimaffeqanngitsut, juullisioqatissaqanngitsut toqqissisimallutilluunniit juullisiorsinnaanngitsut kisimiinnatik juullisiorsinnaalerput
Narsaq illoqarfik inukitsunnguuvoq, 1700-t missaanni inoqarluni.
Amerlanerit imminnut ilisarisimapput, amerlasuullu ilaqutariipput eqqarleriillutilluunniit ilaallu suleqatigiipput allatulluunniit imminnut ilisarisimallutik.
Taamaattoq inuiqatigiinnguani inoqarpoq juullisioqatissaqanngitsunik.
Tamatumunnga pissutaasut arlaliusinnaasut inuusuttunnguaq Helga Motzfeldt, 21-nik ukiulik oqaluttuarpoq.
– Inoqarpoq kisimiittunik, ilaqutaqaraluarlutik taakkununngakarusunngitsunik, angerlarsimafeqanngitsoqarpoq ilaallu ilaqutaqanngitsuupput; meeraqarportaaq toqqissisimasumik juullisiorfissaqanngitsunik. Tamakku peqatigiillutik nuannersumik misigisaqartikkumallugit juulliararsioqatigiinnissamik aaqqissuussivigut, Helga Motzfeldt oqaluttuarpoq.
Ukiut pingasut matuma siorna siullermeerluni misilippaa meeqqanik inuusuttuaqqanillu ilagisarinngisaminik juullisioqateqarluni.
Naak ilinniartuugamik akissaqarpallaanngikkaluarlutik najugaqatinilu ilinniartut allat marluk iniminni attartukkami sumiiffissaqanngitsunut matortik ammarpaat.
– Meeqqat inuusuttuaqqallu toqqissillutik angerlarsimaffimminni juullisiorsinnaanngiitsut juulliararsioqatigisalerpagut, taamaalillutillu decembarip 24-at misigisaqarfigisarpaat soorlu ilaqutariinni juullisiorlutik, Helga Motzfeldt oqaluttuarpoq.
Meeqqanik inuusuttuaqqanillu taama ilalersuisarneq Helgap 1999-mi Narsarsuarmiit Narsamut atuariartorluni nuukkamili aallartippaa.
– Meeqqat inuusuttuaqqallu misigissutsimikkut timikkullu erloqissutillit ikiorusullugit ajortumiillu ingalassimatinniarlugit aneeqatigisalerpakka, kiisa juullisioqatigiittalerpugut.
Ukiumanna Helgakkut juullisiortitsinerat A-21-mi pissaaq.