Poortukkat tammatut ujarneqartut

Internetikkut niuernerit pileruttorput, kisianni nioqqutissat inniminnikkat ilaannaat pisisumut apuutinngitsoortarput. Post Danmarkip allakkeriveqarnermillu suliallit poortukkat tammarartut sapinngisaminnik ikinnerpaatinniarsaraat.

Internetikkut niuernerit 2007-imi rekordit tamaasa qaangernerpaat, ukiumut siulianut sanilliullugit sisamanngorlugit aggornerisa pingasunik amerleriarsimallutik. Pisialli ilaat pisisunut apuutinngitsoortarput, kisianni Post Danmarkip aamma Foreningen for Distance- og Internethandel-ip (FDIH) tammartartut sapinngisamik ikinnerpaatinniarlugit sulissuteqarput. Suliniarnerit iluaqutaalereerput, kisianni suli poortukkanik tammartoqartarpoq, Ritzau allappoq.

- FDIH suleqatigilluarsimavarput, tamannalu malunnartumik iluaqutaasimavoq. Maanna promille-naat tammartarput, Post Danmark-imi qularnaveeqqusiinermut pisortaq Ebbe Andersen oqarpoq.

Ukioq kingulleq Post Danmarkimi poortukkat allakkallu 49.500-t tammarsimapput, allatut oqaatigalugu poortukkat allakkallu tamarluinnarmiusut 0,00435 procentii.

Kisianni Morten Kamper, FDIH-meersoq isumaqarpoq, kisitsisit suli appartinnerusinnaasut. Pingaartumik cd-nik, dvd-nik computerspil-inillu tunisisartut nioqqutaat apuutinngisaannarput.

Morten Kamper naapertorlugu suli suliffeqarfippassuaqarpoq poortugarsiassaminnik tammartoortartunik.

- Taakkuuneruppullu internetikkkut niuertut cd-nik, dcd-nik computerspil-inillu nioqquteqartartut. Aamma atisaarniarfiit soorlu Hennes & Mauritz aamma Bonaparte poortukkanik tammartoorlutik misigisaqarfigisarpaat. Poortukkat tassaanerupput sunik imaqarnerinik eqqoriaruminarnerusut, Ebbe oqarpoq.

Post Danmarkimi 2005-imi allakkeriveqarfinni aalajangersimasuni sulisut misissuiffigineqartalersimapput, kisianni suliaq tamanna naggataagut akilersinnaajunnaarpoq. Maanna periaaseq taanna qimanneqarsimavoq, Ebbe Andersen nassuiaavoq.

- Taamatut misissuisarnerni sulisut allat poortugaataanik tigumiallit paasisoorneq ajorpagut. Aamma naatsorsuutigaarput periaaseq tamanna pitsaaliuinermik sunniuteqarsimanngitsoq, Ebbe Andersen oqarpoq.

Post Danmarkimi suliffeqarfissuup iluani peqquserlunniartoqartarneranik paasiniaanerit suli ingerlanneqarput - kisianni qanoq iliorluni taamaaliortarnersut isertugaataavoq.

- Sulisugut 25.000-it missaanniipput, tassa provins-imi illoqarfiit innuttaasa amerlaqataat. Aamma allakkerivinni sulisut allatulli inuupput - 99,9 procentii inuupput nalinginnaasut unneqqarissuullutillu, qularnaveeqqusinnermut pisortaq taamak oqarpoq.

Powered by Labrador CMS