Perorsaasunik amigaateqarneq ajornartorsiutaaqisoq
KIIIP-mit kisitsisit kingulliit takutippaat kalaallisut perorsaasutut atorfiit affangajaat sulisunik ilinniarsimanngitsunik inuttaqartut.
Nunami perorsaasutut atorfinnit 303-nit 152-it perorsaasunik ilinniarsimasunik inuttaqarput 151-illu ilinniarsimanngitsunik inuttalqarlutik, taamatut allappoq knr.gl.
Kalaallit Nunaanni pisortat meeraaqqerivii 19-iupput, meeqqerivii 16-iullutik assigiinngitsunillu ukiulinnut paaqqinnittarfiit 46-uullutik. Kommunimi ulluunerani paaqqinnittartut inuinnaat ilanngullugit inissat katillugit 3997-iupput. Tamatuma sanitigut ulluunerani paaqqinnittarfinni namminersortuni meeqqanut 84-inut inissaqarpoq.
Meeqqat 0-miit 5-inut ukiullit katillugit 5178-it inissat 4100-t missarpiaanniittut atorpaat, taamatut KIIIP aviisimut Meeqqerivitsialak-mut paasissutissiivoq, erseqqinnerusumik oqaatiginagu qanoq isilluni taamaasiortoqarsinnaanersoq.
Ulluuneranili paaqqinnittarfimmut inissaqarnissaq eqqarsaatigalugu sunissaq qaamanerulaarpoq. KIIIP-p naatsorsuutigaa 2010 tungaanut meeqqat ikileriassasut, kommunillu aaqqissuuteqqinnerisa kingorna paaqqinnittarfiit amerlassusaat allanngussanatik. Ullumikkut assersuutigalugu Nuummi meeraaqqerivinni inissanut utaqqineq ukiut aappaata affaaniit ukiunut marlunnut sivisussuseqarpoq meeqqerivinnullu inissanut utaqqineq ukiup affaaniit ukiup ataatsip tungaanut sivisussuseqarluni.