Nuummi tarnikkut siunnersorfigineqarnissamik utaqqisut 77-it
Nuup Kommunea 2003-mi Tarnikkut/Perorsaanikkut Siunnersuisarfimmik (PPR) peqalermalli inassuteqaatigineqartartut pingasoriaammik amerlisimapput, taamatut allappoq knr.gl.
Tamatuma kingunerisaanik ullumikkut siunnersorneqarnissamik utaqqisut 77-iupput. Taamatut KIIIP aviisimut Meeqqerivitsialak-mut paasissutissiivoq.
- Tamatuma ilaatigut takutippaa suliffeqarfittut kommunimi ingerlallualersimanitsinnut, aammalu pingaaruteqartoq siusinnerusukkut iliuuseqarnissaq sammineqarnerujussuanngorsimasoq, PPR-imi tarnip pissusiinik ilisimatuut pisortaat oqarpoq.
Ukioq manna Nuummi PPR 77-inik inassuteqarfigineqarsimavoq. Immikkoortoqarfiup atulersimavaa oqaloqatiginninnissamut siullermut sivisunerpaamik sapaatip akunnerini sisamani utaqqisoqartassasoq. Sullitat affaasa missaat meeqqat pissusilersornerannut, attavigineqarnerannut atugarissaarnissaannullu atatillugu ikiorserneqarnissamik pisariaqartitsipput.
Nuummi PPR-iimi sulisorineqarput tarnip pissusianik ilisimatuut sisamat, oqalunnermik naalaarnermillu perorsaasut marluk, socialrådgiverit marluk, immikkut atuartitsinermi siunnersorti aammalu allaffimmi fuldmægtigi.