Kalaallit Nunaat Islandilu suleqatigiilerusupput
Aningaasaqarnermut Nunanullu Allanut Naalakkersuisup Aleqa Hammondip Islandimi nunanut allanut ministeri Ingibjörg Sólrún Gísladóttir nunatsinnut 2008-p aallartinnerani tikeraarsarpaa
– Naalagaaffeqatigiinnerup iluani namminersuleriartortilluta nuna sanilerisarput kangiatungitsinniittoq suleqatiginerusariaqarpugut, soorluttaaq nunanik kitaatungitsinniittunik attaveqalereersimasugut. Islandimiunit ilikkagassaqaqaagut nunanullu allanut politikkimut tunngatillugu Islandimiunik oqaloqateqarnerusarnissarput pissusissamisuuginnarpoq, Aleqa Hammond oqarpoq.
Naalakkersuisup ministerillu isumaqatigiissutigaat, tulliani ataatsimiinnissami sammisat attuumassutillit oqaloqatigiissutigissallugit kiisalu siunissami suleqatigiinnissami killiliinissamik pisariaqartitsisinnaaneq oqaloqatigiissutigissallugu.
Nunat avannarliit kiisalu nunat avannarliit killiit suleqatigiiffigisartagaasa saniatigut Kalaallit Nunaat Islandilu nunanut allanut politikkikkut tunngasutigut aaqqissuussaasumik suleqatigiilissallutik aatsaavissuaq sulissuteqarput.