Pisiffik utoqqatserpoq
Qaqortumi Pisiffimmi sulisoq ataaseq suliunnaarsinneqarallarpoq, sapaatiummat nukappiaqqap 9-nik ukiullip pisiniarfiup qerititsivianut parnaarunneqarnerani peqataasimagami, KNR ilisimatitsivoq.
- Ilaqutariinnut allakkagut nassiutereerpagut, qaqortumi pisimasoq assorujussuaq ajuusaarutigalutigu, taamak tuniniaanermut pisiniarnermullu pisortaq Per Steen Larsen Sisimiuniit KNR-imut oqarpoq.
Nukappiaraq 9-nik ukiulik sapaatiummat qerititsivimmut mattunneqarpoq. Taanna meeqqallu allat pisiniarfiup eqqaani pinngursimapput, ilaatigut igalaanut kasuttoqattaarlutik. Taamaaliornerat sulisut uuminartissimavaat, nukappiararlu pisiniarfiup qerititsivianut eqqussimallugu, tassanilu minutsit pingasut missaanni mattusimatissimallugu.
- Taamatut pisoqartussaanngilluinnarpoq. Angut inuusuttoq nukappiaqqamik qerititsivimmut eqqussisoq suliunnaarsinneqarallarpoq, suliap qanoq ingerlasineranik paasiniaanerit naammassinissaasa tungaanut, Per Steen Larsen oqaluttuarpoq.