Nuummi akileraarut allanngussanngilaq
Nunatsinni illoqarfiit pingaarnersaanni kommunalbestyrelsip 2008-mut missingersuutai 127 millioner koruuninik amigartoorutitaqarput
Nuummi 2008-mi kommunimut akileraarut aalajangiunneqarpoq 25 procentiussasoq - nunalu tamakkerlugu akileraarut 11 procent aammalu kommuninut ataatsimut akileraarut 6 procent ilanngullugit aappaagu Nuummi akileraarutip procentia tamarmiusoq allanngorani 42-uussaaq.
Nuummi kommunalbestyrelsip 2008-mut missingersuut tamakkiisumik isumaqatigiilluni akuersissutigeqqammerpaa.
Ingerlatsinermi aningaasartuutit 766 millioner koruuninut missingersuutigineqarput sanaartornermullu aningaasartuutissat 231 millioner koruuninut missingersuutigineqarlutik - 2008-mi aningaasartuutissat katillugit 997 millioner koruunit.
Isertitassat 870 millioner koruuninut naatsorsorneqarsimapput.
Taamaasilluni Nuuk 2008-mi 127 millioner koruuninik amigartooruteqassaaq.
Tamannali kommunalbestyrelsip ernumanartoqartinngilaa.
Nuup Kommuneata ukiut tamaasa sanaartornermut suliassat millioninik pingasunik kisitsisilinnik annertussusillit kinguartittarpai, pissutigalugu pilersaarutit, kommunimi politikerit akuersissutai, kommunip aallartinngitsoortarmagit.
2008-mut kommunip missingersuutaata akuersissutigineqwarnera kommunalbestyrelsip ataatsimiittarfiani ersaattaatigineqarpoq.
Kommunalbestyrelsi missingersuummik naggataajusumik akuersissuteqarpoq. Aappaagu ukiakkut 2009-mut missingersuut ikaarsaariarnermi ataatsimiititaliamit, kommuninit tallimanit tamanit, nutaamik Tunu/Kitaa-kommuninngortussami, sinniisulimmit akuersissutigineqassaaq.