Taxacentrali nutaaq akerliussutsimik takutitsiffigineqartoq

Nuummi taxacentralituami, Nuuk Taxi A/S-imi, 36 36 36-imik normulimmi, biiliutillit taxamillu ingerlatsisartut amerlaqisut kommunalbestyrelsip ataatsimiittarfianut takkussimapput, kommunalbestyrelsip ataasinngormat unnukkut marlunngormallu ullaakkut illoqarfimmi centralip nutaap ammarneqarnissaa akuersissutigimmagu.

Rådhusip saavani taxarpassuit uninngapput unammillertertaartik akerliussutsimik takutitsivigalugu, tamannali iluaqutaanngilaq.

Ataasinngormat unnukkut ataatsimiinnerup pisoqarfioqisup, borgmester Agnethe Davidsenip marlunngornermi ullaamut kinguartittariaqagaata, kingorna centrali nutaaq Taxagut telefonnormulik 321 321 ukiortaap kinguninngua pilersinneqarnissaminut akuerineqarpoq.

Nuummi taxanik ingerlatsineq ukiumi makkunani tatineqarpoq. Nunami illoqarfiit pingaarnersaanni taxanik ingerlatsineq aalajaatsumik ukiumut 60 millioner koruunit missaannik isertitsiviusarpoq, taxamilli ingerlatsinermi aningaasartuutit qaffariartuinnarsimapput.

Nuummi taxat ukioq mannaannaq 72-iniit 58-inut ikileriarsimapput, atuisartullu amerlaqisut sivisuumik utaqqisinneqartarput - centralimut anngukkaluarunik.

Centralimik nutaamik Taxagutimik pilersitsisoq tassaavoq biiliutilik Jan Seidsen, nammineq centralimi nutaami biilinik arfineq-pingasunik ingerlatitsisussaq. Taanna isumaqarpoq taxacentrali Nuuk Taxi A/S-imit akilersinnaanerusumik ingerlassinnaallugu - atuisartunut biiliutilinnullu iluaqutaasumik.

Kommunalbestyrelsip ataatsimiittarfiani oqallinneq paasiuminaallisinneqarpoq kommunalbestyrelsimi ilaasortat arlallit taxartartunut qanimut attaveqarmata.

Doris Jakobsenip, Siumut, ataasinngormat unnukkut Nuummi allamik taxacentraleqalernissaa akerlerilluinnarpaa.

Taassuma aappaa ataataalu Nuuk Taxi A/S-imi taxaatiliupput, unammillertimik nutaamik eqqorneqartussat.

Marlunngormalli ullaakkut Doris Jakobsen suliassami attuumassuteqarpallaartutut nalunaartariaqarpoq, taaseqataanngilarlu taxacentrali nutaaq akuerineqarmat 8. januar aallartissinnaasoq.