Elna Egede Dansk Journalistforbundimit nersornaaserneqarpoq
Dansk Journalistforbundip legatia, Carsten Nielsens legat-i, tusagassiortumut sulisunullu sinniisumut Elna Egedemut tunniunneqarpoq.
Nersornaat Københavnimi Dansk Journalistforbundip Fagligt Forum-iani agguaanneqarpoq. Nersornaat ilaatigut "Innuttaasut qullersaannut isornartorsiuisimanermut" tunniunneqartarpoq.
- Nersornaaserneqartoq suliamini nukissatut tusagassiortarnermigut suliani iternga tikillugu paasisaqarusussutsimik kissaateqarsimavoq eqqartuusorlu oqaluttuaralugu. Tusagassiortup sammisat oqaluuserineqarnaveersaarneqartartut annersaasa ilaat naakkittaalluni qulaarniarsimavaa, taamalu nuna qaartartunillusooq ulikkaartoq aqqusaartorlugu ingerlaarsimavoq, nammineq eqqorneqartinnani aqqutiginiassalugu ajornangajaalluinnartukkoorsimalluni, taamak Dansk Journalist forbundip siulittaasua Mogens Blicher Bjerregaard agguaassinermut atatillugu oqalugiarnermini oqarpoq.
Elna Egedep qujassuteqarluni oqaaseqarnermini erseqqissarpaa, nersornaat taamaattoq nersornaatisiarigamiuk qujamasullunilu tuppallersimaluni.
- Tuppallernartuuvoq uagut Kalaallit Nunaanni aaqqissuisoqarfinni mikisunnguani assut tatineqarluta tusagassiorfinnilu ikittuinnannguaannarni sulisuugatta. Atugassarititaasut minnerpaaffianniittut atoraluarlutigit inuiaqatigiit ukiuni 30-ini partii socialdemokraatiskiusoq ataasiinnaq siuttoralugu ajornakusoortorujussuit eqqumiitsortaqaleriartuinnarsimasorlu qulaajarniartarsimavarput, Elna Egede ilaatigut oqarpoq.
Nersornaat ilusilersukkamik bronzeusumik ilusilersuisartumit Jørgen Haugen Sørensenimit sanaamik 20.000 kr.-inillu aningaasartalimmik imaqarpoq.
Siulittaasup oqalugiaataa (qalllunaatut) spaltemi talerpimmiittumiit download-erneqarsinnaavoq. elna Egedep qujassuteqarluni oqalugiaataa (qallunaatooq) aamma taamatut download-erneqarsinnaavoq.