Qimussertartut atuartut
destination Dikso aamma Kalaallit Nunaanni Takornariaqarnermut Inuussutissarsiornermullu Siunnersuisoqatigiit qeqertarsuup Tunuani qimussiussisartunut oqaatsitigut, kiffartuussinermut ikiueqqaarnissamullu pikkorissarnernik ingerlatsiniarput.
Tamanna pissaaq Qeqertarsuup Tunuani qimussiussisartut amerliartuinnarmata, GTE nittartakkamini allappoq.
- Siunertaavoq, qimussiussisartut tungaanniit takornariat tungaannut kiffartuussinerata imaata assigiimmik qaffasissumik inissisimanissaata anguniarnissaa. Takornariat amerligalulluinnartillugit aammalu qimussersartut aalisarunaarlutik qimussiussisalersut amerliartortillugit arlaatigut atuarteqqinneqarnissaq pisariaqalersimavoq. Pikkorissarnerit pissarsiaqaatigilluarnissaat naatsorsuutigaarput, taamak oqarpoq Konrad Seblon, Destination Disko-mi pilersaarusiornermut siunnersorti Inussuk.gl-imut.
Pikkorissarnerit qimussiussisarnermut atatillugu takornarianik sullitaqarnermi oqaatsit, kiffartuussineq aammalu ajutoortoqarsinnaanerani ikiueqqaarnermi inuussutissarsiorpalaarnerusumik ingerlatsilernissaq naatsorsuutigineqarpoq.
Pikkorissarnerit Kangaatsiami, Aasianni, Qasigiannguani, Qeqertarsuami, Ilulissani aamma Uummannami ukiup ingerlanerani ingerlanneqassapput.