S-gruppi eqqaaniaavoq

– Arnaq pikkorissoq tunniusimasorlu annaavarput, Nuummi kommunalbestyrelsimi S-gruppip siulittaasua Ane Egede Mathæussen parteeqatsik Agnethe Davidsen pillugu allappoq.

Gruppip siulittaasuata Ane Egede Mathæussenip Nuup kommuneani S-gruppip borgmester Agnethe Davidsenimut eqqaaniutaa una nassiuppaa:

»Agnethe Davidsen-mut eqqaaniut

Asasatta Borgmester-itta Agnethe Davidsen-ip ullaaralaaq Sapaammi 25.November 2007 alianaqisumik toqukkut qimagunnerani, kinguaavi meerai ernera Søren aappaa meeraalu aammalu pania Heidi uialu meeraallu, aammalumi minikkusunngilara ukiuni arlaqaqisuni uigisimasaa Aqqaluartaa, qanigisaallu taamaasa uummammik pisumik misiginneqatigingaarpassi, aammalu ikinngutigilluagai tamaasa annaasaq tamattinnut annertuvoq, tamatta ilisarisimannittut nalunngilarput Agnethe inuttut qiimasuusoq nuannaartorlu, tamattinnullu ajunngikkallarami nikallujaalluni artornartunik atugaqarnittinni nukittorsaajuartuarnera maqaasissaqaarput.

Agnethe-p inuuffigisani Nuuk uummateqarfigilluinnarlugu sutigut tamatigut ajunnginnerpaaq anguniarlugu suliniartuarsimammat qutsavissaqarfigilluinnarparput.

Uanga ukiut qulit sinnerlugit suleqatigisimagakku Siumup iluarni Kommunalbestyrelse-mi suleriarnissattinni maqaasissaqaarput.

Oqartarneratuulli suna tamarmi tamaannga unissanngilaq, suliat uummateqarfigalugit ingerlassimasai naammassinissaata tungaanut angutserlugit ingerlaqqissaagut.

Nunaqqatitsinnut tamanut aammalumi sinerissamiit nunanillu allaniit misiginneqatiginnillutik tutsiuttunut qujanngaarpugut.

Arnaq pikkorissoq nukittooq suliaminut tunniusimalluartoq annaavarput.

Tulluartuusorigakkulu una taallannguaq ilanngutilaarpara.

Kalaallinit perortugut nunarput kiffartuunniassavarput. Nunarsuaq! Imarsuaq! Ilissi asasatsitut pigaassi! Tusarlugit malillugillu, ilaarlugit, nangittumillu nipaat siulivitta tusaaneqarniarput nutaasumik inuiattut atasuusunit.

Borgmester-itta Agnethe Davidsen-ip Eqqaaneqarnera ataqqinartuuli.

Ane Egede Mathæussen

Kommunalbestyrelse sinnerlugu

Siumut Gruppe-mi Siulittaasoq.«

Powered by Labrador CMS