Ilassinninneq imalunniit nammineq
Jens Napaattuup allatsigisimasaata nalileruminaatsittarsimavaa, nereqatigiinneq kortimik kuultimik akiligaq namminermoortuunersoq ilassinninnermoortuunersorluunniit.
Naalakkersuisunut ilaasortaasimasup Jens Napaattuup eqqartuussivimmi suliarineqarneranut atatillugu ulluni tallimani ingerlanneqartussaasumi ullut aappassaanni ilisimannittut arlallit aggersarneqarsimapput. Taakkununnga ilaavoq Jens Napaattuup naalakkersuisuugallarami allattaa Ulrik Josefsen, ullumikkut ineqarnermut piosrtaqarfimmi allaffimmi pisortaasoq.
Ulrik Josefsen allattuunermi nalaani Jens Napaattuup angalanerpassuisa ilaanni peqataasarsimavoq, nereqatigiinnernullu bilagit arlalissuit ilassinninnermut tunngasutut nassuiaaserneqarsimasuni Jensip kreditkortia nereqatigiinnernut akiliiutitut atorneqartarsimavoq. Nereqatigiinnerit ilassinninnermut atorneqarsimasutut nalunaarsorsimappata bilagini peqataasut aqqi ilassinninnermullu suna tunngaviunersoq allassimasussaapput. Taamaattoq Ulrik Josefsenip ilisiannittutut apersorneqarnermini arlaleriarluni nereqatigiinneq ilassinninnerunersoq imaluunniit nammineq inuttut nereqatigiinnerunersoq nalileruminaatsittarsimavaa, naak nereqatigiinneq ilassinninnermut kontu atorlugu akilerneqarsimagaluartoq.
– Ilassinnittarneq pillugu kaajallaasitaq nutaaq 2005-imi atuutilersoq sioqqullugu ileqquuvoq naalakkersuisunut ilaasortat pisortatigoortumik nereqatigiinnernut nuliatik meeqqatillu ilagisarlugit. Kisianni ikinngutit ilisarisimasallu ilanngullugit qaaqquneqarsimatillugit tamanna ilassinninnertut taaneqarsinnaanersoq nalileruminaattarpoq, taakku politikkimik suliaqanngimmata. Kisiannili nereqatigiinnerup nalaani politikki oqaluuserineqarsimappat tamanna ilassinninnertut taaneqarsinnaasarpoq, taamanikkut naalakkrsuisunut ilaasortat ikinngutitik ilisarisimasatillu isumasioqatigiinnernut atortarmatigit, Ulrik Josefsen oqarpoq, ilanngullugulu oqarpoq nereqatigiinnerit nammineq inuttut imaluunniit ilassinninnermut tunngasuunersut nammineq nalilersugassarinagit. Tamanna naalakkersuisunut ilaasortap nammineq naliligassaraa.
– Kisianni nereqatigiinnerup nalaani politikki oqallisigineqarsimanngippat nereqatigiinneq nammineq inuttut nereqatigiinnertut nalunaarneqassaaq. Tamanna naalakkersuisunut ilaasortap naliligassarisarpaa, Ulrik Josefsen oqarpoq.
Inussiarnersumik naalakkiinerit
Jens Napaattuup ikinngutini iliarisimasanilu nereqatigiinnissamut qaaqquniaraangamigit allatsiminut sianertarpoq, taannalu nerrivimmik inniminniinissaanik qinnuigalugu.
– Taamatut nerrivimmik inniminneeqqullunga qinnuigigaanganga apeqqusinngisaannarpara. Arlaleriarlunga kikkut peqataasussanersut sunalu peqqutaanersoq nalusarpara. illoqarfimmi neriartussasugut oqaraangat inussiarnersumik naalakkiinertut paasisarpara. Taava nereqatigereernerup kingorna naalakkersuisunut ilaasortap uangalu bilagit immersortarpagut, nereqatigiinnermut suna tunngaviunersoq kikkullu peqataasimanersut, Ulrik Josefsen oqarpoq.