Peqqinneq torrattumik periuseqarluni

Unammisitsinerup "Peqqinneq torrattumik periuseqarluni" namminersornerusut pitsaaliuinermik ingerlatsivianit PAARISA-mit ingerlanneqartoq atuartut nukarlerniit angajullernut periarfissippai, qulequttaq peqqinneq atuarfimmi nuannersumik nuannersumik qiimanartumik samminissaanut, Namminersornerusut paasissutissiisarfiat Tusagassiivik taamak ilisimatitsivoq.

Kalaallit Nunaanni meeqqat atuartut nerisassat peqqinnartut pillugit ilisimasaqarnerulernissaat pisariaqarsimavoq. PAARISA-p kalaallit meeqqat atuartut 6. klassemiit 11. klasse tikillugu peqqissusiisigut atugaasigullu 2006-imi misissuisitsisimanera naapertorlugu taassuma ilaatigut takutippaa, atuartut 405-tii sapaatip akunnerata ulluisa affaanik ikinnerusuni ullaakkorsiortartut, atuartut 40%-tii nerisassanik sukkulinnik ullut tamaasa imerlutillu nerisartut aammalu atuartut 50%-tiisa missaanniittut ikinnerpaamik sapaatip akunneranut ataasiarlutik fastfood-inik nerisaqartartut - amerlanerpaat nunaqarfinni.

15-init 17-illu akornanni ukiulinni misissuinermi Kalaallit Nunaanni inuusuttut atugaat 2004-mi aamma takuneqarsinnaavoq, inuusuttut 22%-tii ullut tamaasa imaluunniit ullut tamangajaasa grillmad-itortartut aammalu 48%-tii sapaatip akunneranut ataasiarlutik grillmad-inik nerisaqartartut.

Unammisitsinermi atuartut pilersitseriarsinnaanermut tunngasunik suliassinneqassapput, nammineq ukioqqortussusiannut naleqqussarlugit sulianik. Atuartut akissuteqartarnermikkut nerisassat suut peqqinnartutut isiginerlugit takutissavaat, aamma atuarfimmi nerisassat namminneq nererusussinnaasatik pillugit siunnersuusiussapput.

Unammisitsinerup siunertaraa nerisassanut peqqinnartunut tunngatillugu ilisimaarisaqalernissamik, kajumissuseqalernissamik isummersinnaalernissamillu pilersitsinissaq. Siunertaq alla tassaavoq, atuarfimmi nerisaqartitsisarnermut tunngatillugu imarisassaanut killiliussassanullu tunngatillugu aalajangiiniarnernut sunniuteqaqataasinnaanissaat.

Atuarfiit tamarmik decembarip aallartinnerani atortussanik nassinneqassapput.

Unammisitsinissami peqataanissamut nalunaarneq PAARISA-p nittartagaatigut www.paarisa.gl-ikkut pissaaq, tassani aamma unammisitsinissamut atortussat takuneqarsinnaapput.

Peqataanissamut nalunaarnissaq 2007-imi juullimut atuanngiffeqarnissaq sioqqullugumut killinerneqarsimavoq suliakkiissutinullu inernerit 2008-mi marsip 31-at nallertinnagu nassiunneqareersimassapput.

Atuartoqatigiikkuutaanit tamanit siunnersuutit pitsaanersaat pingasut akissarsisinneqassapput. Akissarsiassat annersaraat igasumik ilinniarsimasumik illormi ataatsimi peqateqarnissaq checkilu 20.000 kr.-inik aningaasartalik.