IA: Namminersortut qimaasunik tikilluaqqusissapput
Inissaaleqineq apeqqutaanngilaq: Kalaallit Nunaat namminiilerpat nunat allamiunut/qimaasunut tunngasut oqartussaaffigilerumaarpagut. Kisianni takornartanut tunngatillugu qanoq pissuseqassanerluta oqaluuserisariaqarparput, IA-p siulittaasua kajumissaarivoq.
IA-p siulittaasua Kalaallit Nunaata qimaasunik nunaniillu allamiunik tiguserusussinnaanera tigusisinnaaneralu pillugit oqallinnermut maanna qisuariaateqarpoq. Naalakkersuisut siulittaasuanut Hans Enoksenimut illua-tungiliulluni Kuupik Kleist isumaqarpoq, inissaaleqineq Kalaallit Nunaata qimaasunik tigusisinnaannginneranut utoqqatsissutissatut atorsinnaanngitsoq.
– Uagut nammineq ajornartorsiuteqarnermut innersuussutigalugu inuit ajornartorsiortut allat ikiorusunngissinnaanngilagut. Aamma illoqarfiit ilaanni inissaaleqineq utoqqatsissutigisinnaanngilarput, peqatigitillugu illoqarfinni allani innuttaasut ima ikiliartorsimatigisut inissiat allaat isaterlugit, IA-p siulittaasua Kuupik Kleist oqarpoq.
Taassuma erseqqissarpaa Kalaallit Nunaata maannamut qimaasunik ikittuinnarnik tigusaqarsimaneranut peqqutaasoq, nunat allamiunut, qimaasunut, imaluunniit qimarngusunut akisussaaffik Danmarkip tigummimmagu, aammalu qimaasut ikittuinnannguit Kalaallit Nunaannukarnissartik kissaatigisarsimagunarmassuk. IA aalajangiisuugaluarpat namminersorneq eqqunneqartuuppat Kalaallit Nunaata nammineq qimaasunut tunngasut akisussaaffigilissagaluarpai.
Kuupik Kleistip aamma erseqqissarpaa, qimaasut nunasisillu allat immikkoortittariaqartut. Inuit atorfininnermut atatillugu nunasisut piumasaqaatinut nalinginnaasunut ilanngunneqartarput, piffissami sivikinnerusumi sivisunerusumiluunniit nunasigallartinneqarsinnaallutik. Inuit sorsuttoqarnera, eqqissiviilliornerit allat imaluunniit politikkikkut isummatik aammalu inuunerminnik navianartorsiortinneqartutut misigisimasut qimaasutut isigisariaqarput.
– Qimaasut danmarkimut pisut amerlasoorpassuit atugarliorluni inuunissamut pulasarsimapput, ilaat ukiorpassuarni, qimarngusunut katersuussivinni parnaarussaaqqallutik. Qamunna neriuutigeqaara uagut ullut ilaanni qimaasunik tigusisinnaalissagaluarutta tigusisinnaaleruttalu periutsit taamaattut atunngisaannarnissaat, Kuupik Kleist oqarpoq.