GU-p nutarternera piariilerpoq

Maannakkut ersarissivoq aaqqissuusseqqinnermik suliaqartut maannakkut GU-mi, HTX-imi aamma HHX-imi ilinniarfiit ilinniarnertuunngorniarfimmik ataasiinnarmik taarsernissaannik siunnersuut annertuumik tapersersorneqartoq, tassa ukiumi siullermi ataatsimut sammisaqarfik, tamatumalu malitsigisaanik ilinniartoq ilinniagassaminik ukiuni marlunni ingerlanneqartussamik toqqaassalluni.

Aammattaaq ersarissivoq august 2009-mi aaqqissuusseqqinnerup atulersinnerani sisamanik ilinniarfeqassasoq Aasianni, Sisimiuni, Nuummi aamma Qaqor-tumi. Politikkikkut kissaataavoq ilinniartut amerlassusaat amerlineqas-sasut, taamaattumik ilinniartunik amerlanernik tigusisinnaasunik piginnaasanik pissarsisoqassaaq.

Suleqatigiissitamit siunnersuutigineqarpoq ilinniarnertuunngorniarfinni tamani 1.g ataatsimoorfiusoq ilinniartunut tamanut neqeroorutigineqassasoq. 2.g-mi ilinniartut ilinniagassaq sorleq toqqarusutartik qinissavaat.

Ilinniarfinni tamani sammineqarsinnaasut tallimat neqeroorutigineqassapput, taakkunannga sisamat ilinniarfinni tamani assigiissapput. Sammisani tamani ilinniartut atuartitsissutinik nammineq qinersinnaasanik 1-2 toqqaasinnaassapput. Ilinniarfinni tamani aamma sumiiffimmi ilin-niagaasinnaasoq ataaseq neqeroorutigineqassaaq, ilinniartunit atuartitsissutinik sapernarnerusunik sammisaqarusuttunit toqqarneqarsinnaasut taamatullu ingerlataqarnissamut 1.g-mi atuarnerminni akuerisaassallutik.

Ilinniartut tamarmik sammisassanik tallimanik atuartitsissutini arlalissuarnik peqassapput 1.g-mi toqqarsinnaasaminnik. Kommunimi pineqartumi najugaqarfigisami ilinniarnertuunngorniarfimmi neqeroorutigineqanngitsumik atuartitsissummik aalajangersimasumik sapernartumik toqqaarusukkaanni atuarfimmut allamut nuussinnaaneq aamma periarfissaassaaq.

Ilinniarfimmiit nuussinnaaneq neqeroorutaassaaq ilinniartut tamarmik atuartitsissutinik sapernarnerusunik qinersisinnaanerannik qulakkeerinnittoq, nunap immikkoortuani sumiinneq apeqqutaatinnagu. Misilittakkat takutippaat ilinniarnertuunngorniarfiit ikittuinnarnik ilinniartoqarneri pissutigalugu assersuutigalugu tuluttoornermik matematikimiluunniit sapernarnerusumik ingerlataqartussanik pilersitsisoqassanersoq nalaatsornerusoq nunallu immikkoortuini equngasumik agguarsimasartut.

Suleqatigiissitamit siunnersuutigineqarpoq nuna tamakkerlugu ilinniarnermi sammisassat sisamat 2009-mi tassaassasut inuiaqatigiilerinermik,pinngortitalerinermik, eqqumiitsulerinermik aamma peqqinnissamut sammisumik ilinniagaqarnerit, immikkullu ilinniagaqarfiusinnaasut sisamat tassaassasut oqaatsinik, teknikkimut, niuernermut pinngortitamilu ilisimatusarnermut tunngasut