Sermitsiap AG-mik suleqateqarneq unitsippaa
Suliniut Kalaallit Nunaanni tusagassiuteqarfiit aviisit marluusut piuinnarnissaannut qularnaarinnittussaq unitsinneqarpoq. AG-p siulittaasuata tamanna paasiuminaatsippaa.
Sermitsiap siulersuisuisa unammillertigisamik AG-mik (Atuagagdliutit/Grønlandsposten) suleqatigiinnissamik pilersaarutit unitsippaat.
Siulersuisut siulittaasuat Hagen Høyer Christensen naapertorlugu tamatumunnga peqqutaavoq, AG-mi aqutsisut suleqatikkuminaassimaneri.
- Siunissami aaqqissuussaaneq pillugu suleqatigiinnissaq, assersuutigalugu ataatsimoorluni peqatigiittumik suleqatigiilluni piginneqatigiiffiliornissaq, aningaasaqarnikkut pilersaarusianik aalajangersaanissat aaqqussuussaanermullu pilersaarutit siulersuisut naatsorsuutigisaanut naapertuussimanngillat, taamaattumik pilersaarutit maannakkut unitsikkallarsimavagut, Hagen Høyer Christensen oqarpoq.
AG-mi siulersuisut siulittaasuata Ole Kielmann Hansenip suleqatigiinnerup taamaatinnera tupaallaatigaa.
- Sermitsiap siulersuisuisa suleqatiginnikkumajunnaarnerat ajuusaarnartuutipparput, aalajangerneralli ataqqivarput neriullutali suli ingerlaqqittoqarsinnaasoq, Ole Kielmann Hansen oqarpoq.
Suleqatigiinneruptaamaatinneqarnera sumik pissuteqarsinaanersoq paasinnginnerarpaa.
- Siulersuisunit allagarsivigut, soorli suleqatigiikkunnaartariaqarnermut nassuiaatitaqanngitsumik, AG-p siulittaasua oqarpoq.