Kigutit putui sorsunneqalerput
2012-mi qulingiluanik ukiullit 80 procentiisa kigutaasa putoqannginnissaat periusissami anguniarneqarpoq.
Qaammarsaanerit, kigutit qanoq issusaannik nalunaarsuinerit siusissukkullu meeqqanut angajoqqaanullu pinaveersaartitsiniarnerit periusissami nutaami tunngaviusut, peqqinnissamut pisortaqarfimmi kigutit nakorsaanerat Frank Senderovitz ilisimatitsivoq.
Caries imaluunniit - kigutit putui - nappaataavoq kigutit salilluartarnerisigut pinaveersaartinneqarsinnaasoq. Caries pilllugu periusissami kigutit qanoq ipiitsuutinneqarnissaasa pingaaruteqartiginerat inuiaqatigiinni paasineqarnissaata siaruartinneqarnissaa, tassungalu atatillugu annertunerusumik ilisimasaqalernissaq.
Meeqqap arfineq-pingasunik qaammateqalerneraniit kigutigittuunissaannik suliniuteqarneq qaammarsaanerlu kigutigissaanermi suliniutit nutaat ilagissavaat. Tamatumalu kingorna meeraq angajoqqaavilu pilersaarusioqqissaakkamik malittarisassamik tunngavilimmik kigutileriffimmiik qaaqquneqartalissapput, meeqqap kigutaasa qaqugukkut puttukkiartortarnerat aallaavigalugu pisassalluni.
Meeqqat kigutaasa qanoq issusiannik nalunaarsuisarnermi januarip aallaqqaataa 2008 aallarnerfigalugu 3,6,9,12,15-inik ukiullit immikkut ittumik aalajangersimasumik nalunaarsorneqartalissapput. Tassalu taamatut nalunaarsuisalerneq kigutigittuulernissamut anguniakkanik tunngaviusunik piviusunngortitsisinnaalissaaq, soorlu 2012-imi meeqqat qulingiluanik ukiullit 80 procentiisa kigutaasa putoqanngilluinnarnissaat anguniagaasoq.Taamaattumik caries akiorniarlugu suliniarnermi naliliisarnissamilu nalunaarsuisarnissaq qitiulluinnassaaq.
Kigutigissaanerup iluani caries pillugu pilersaarusiami periusissamilu anguniakkat innuttaasut peqqissuunissaannik suliniummut “Inuuneritta”- mut atalluinnartuupput.