Illoqarfimmi inuuneq misissorneqalerpoq
Kalaallit Nunaanni innuttaasut 80 procentii illoqarfimmi inuupput - maannalu ilisimatuut isiginnittarnerit nunaqarfinniit illoqarfinnut saatinnialerpaat.
Ilisimatuut sisamat kalaallit nunaanni illoqarfik taassumalu innuttai siammasissumik isigalugit misissuiffiginialersimavaat - illoqarfiullu tunniukkumasai aallaavigalugit, taamak Polarfronten, Dansk Polarcenterimit saqqummersinneqartartoq allappoq.
Kalaallit nunaata innuttaasa 80 procentii illoqarfinni inuusuupput. Tamanna nunarsuarmi agguaqatigiisitsinermit 50 procentit missaanniittumit qaffasinneruvoq,aammalu nunanit issittuniittunit 75 procentit missaanniittunit suli qaffasinnerulluni.
Taamaakkaluartoq inuiagaqatiigiinnik ilisimatusartartut piffissap ingerlanerni issittumi illoqarfinni inuunerup misissuiffigineqarnissaa aallartinnaveersaartarsimavaat.
- Kalaallit namminneq illoqarfigisaminni qanoq inuuneqarnersut salliutillugu misissorniarparput. Illoqarfinni namminneq eqqeersimaarlutik pilersitaanni sunniuteqaqataaffigisaannilu, pinngitsaalillutik nuutinneqarnatik, Søren Thulesen København Universitet-imi eskimologimik issittumilu pissutsinik ilisimatusarnermut immikkoortortameersoq oqarpoq.
Jakup Christensen Medonos-ip inuusuttut kulturiat qanoq innersoq qulaajarniarlugu Sisimiuni inuusuttut akornanni paasiniaanini naammasseqqammerpaa.
Frank Sejersenip nunaqarfimmiit illoqarfimmut nuukkiartornerup pinngortiamillu aqutsinermut tunngasut akornanni pissutsit misissuiffiginiarpai, Kirsten Thistedillu kalaallit atuakkiaat misissuiffiginiarpai kalaallisut aliikkutassiatut atuakkiaq 1914-imi saqqummeqqaarmalli illoqarfik qanoq paasineqartarsimanersoq akissutissarsiniassallugu.