‘Nordön’ Nuummut tikippoq

Umiarsuup usiisa ilaat annertuumik ajoqusersimapput naatsorsuutigineqarporlu usingiaaneq ajornakusuussasoq sivisussallunilu.

Royal Arcticip attartugaa assartuut Nordön, sisamanngormat Nunap Isuata kujataani anorersuarsiorujussuartoq sapaatiummat unnukkut Nuummut tikippoq, umiarsuullu usingiarneqarnera ataasinngornerup ingerlanerani aallartinneqassaaq.

Umiarsuup akisussaasui aammalu sillimmasiisarfiit attuumassuteqartut ullumi Nuummut tikissapput umiarsuup, containerit aamma usit ajoquserneri takullugit misissoriartorlugit, tamatumalu sapaatit akunneranik sivisussuseqarnissaa naatsorsuutigineqarpoq.

Maannakkut suli ilisimaneqanngilaq nassiussanit tigusisussat kikkut eqqorne¬qarsimanersut, taamaattumik Royal Arctic Linep sullittakkani nassiussanik umiarsuarmiittuutillit qinnuigai utaqqeqqullugit, paasissutissat qanorlu iliortoqarnissaa pillugu attaveqarfigineqarnissaminnut.

Sisimiunut ingerlanissaq pilersaarutaagaluartoq taamaatiinnarneqarpoq, tassa umiarsuup usii tamakkerlugit Nuummi niuneqassammata.

Nordönip usit nassatai illoqarfinnut makkununnga ingerlasussaapput Nuummut, Maniitsumut, Sisimiunut, Qasigiannguanut aamma Ilulissanut. Nassiussat Nuup avannaanut ingerlanne¬qartussat illoqarfiit akornanni assartuisartunut ilaatillugit nassiunneqassapput, nassiussat usingiarneqarnerat kiisalu misissorneqareernerat ilutigalugu, RAL ilisimatitsivoq.

Powered by Labrador CMS