Ukioq manna kapisilinniarneq unippoq

Ukioq manna kapisilinniarneq unnuaru unissaaq, taamak naalakkersuisut KNAPK-lu aalajangerput.

Naalakkersuisut KNAPK isumasioqatigalugu aalajangerput, ukioq manna kapisilinniarneq pingasunngornermi oktobarip 31-iani unnuakkut 24.00 unitsinneqassasoq. Piffissap taassuma kingorna kapisilinniarneq inerteqqutaavoq. Taamaattumik qassutit tamarmik 2007-imi oktobarip 31-iani nal. 24.00 nallertinnagu qaqinneqarsimassapput, taamak Namminersornerusuni Aalisarnermut, Piniarnermut Nunalerinermullu Piosrtaqarfik nalunaarpoq.

Sunngiffimmi inuussutissarsiutigalugulu aalisarnermi kapisilittat tamarmik kapisilinniarneq pillugu nalunaarut naapertorlugu Kalaallit Nunaanni Aalisarnermut Nakkutilliisoqarfimmut nalunaarutigineqartussaapput. Inuussutissarsiutigalugu kapisilinniartartut ullut tamaasa nalunaarusiortassapput, sunngiffimmilu kapisilinniartut pisaqarnerup aqaguani nalunaarutiginnittussallutik. Nalunaarsuinermut immersugassiaq kommunimi imaluunniit nanoq.gl-ikkut pissarsiarineqarsinnaavoq.

Powered by Labrador CMS