Ilinniarluarsimasut amerlasuut Danmarkimi najugaqarput
Misissuinerit nutaat takutippaat, kalaallit 18.563-it Danmarkimiittut amerlanersaat ingerlalluartuusut.
Kalaallinit aallaavillit 18.000-it suna pillugu Danmarkimut nunassissimanersut suli apeqquterujussuuvoq. Kalaallit Nunnaanni inunngorsimasunit arnat amerlanerulluarput.
Kalaallit Danmarkimittut Københavnimi eqqaanilu najugaqarnerupput, 4.157-it tamaani najugaqarlutik, Århusimi 2.382-inik kalaaleqarpoq, Region Nordjyllandilu 2.168-inik kalaaleqarluni.
– Misissuinermit nutaamit kisitsisit inuit allattorsimaffiannit cpr.nr.-llu nalunaarsorsimaffiat tunngavigalugit pissarsiaapput. Taamaattumik kinaassusaa nalunarsagaallutillu amerlassusaannik paasissutissaapput, Sara Olsvig, nalunaarusiamik aaqqissuisuusoq oqarpoq. Nalunaarusiaq Folketingimi Atlantikup avannaanit Suleqatigiusut Kuupik Kleistimit, Inuit Ataqatigiit, Lars-Emil Johansenimit, Siumut, aamma Høgni Høgdalimit Savalimmiuneersumit suliakkiissutigineqarsimavoq.
Kisianni kisitsisit taakkuinnaatillugit erseqqissumik takutippaat, kalaallit Danmarkimittut amerlanersaat ingerlalluartuusut.
Kalaalliniy 18.000-it sinnilinnit 1.777-it pensiunistiupput, 1.287-it erninermut atatillugu imaluunniit suliffissaarusimanermi ullormusiaqartinneqartuupput, 1.782-illu aningaasatigut ikiorsiissutinik pisartagaqarlutik.
– Oqaatigeriikkatuut qaaginnarsiorluni misissuineruvoq. Taamaattumik kalaallit taamak amerlatigisut suna pillugu Danmarkimut nuussimanersut oqaatigisinnaanngilarput. Periarfissat ilagisinnaavaat, ilisimatusarfinni ilisimatuunngorniartut suliamut atatillugu tamanna paasiniarsinnaagaat, misissuinermillu nutaamik suliaqalerlutik. Periarfissaq alla tassaavoq, pitsaassutsimik misissuisinnaanissamut aningaasaliisoqarsinnaanissaa, taamaaliornikkut kalaallit Danmarkimiittut makitsinikkut toqqakkat suna pillugu Danmarkimut nuussimanertik nassuiarsinnaassagaluarpaat, Sara Olsvig oqarpoq.
– Oqaatigeriikkatut kisitsisit 2006-imi januaarip 1-ianeersuupput, kisitsisillu taakku pisoqalereersimasinnaalluarput. Misissuineq piffissap qanittup iluani malitseqartinneqarsinnaasuuppat iluaqqajaraluarpoq, Sara Olsvig oqarpoq.