Meeqqat pillugit nalunaarut: Naammanngilaq

Meeqqat piginnaatitaaffii pillugit isumaqatigiissut naapertorluguOqartussaanut meeqqat inuunniarnerminni atugaat qularnaarniarlugit iliuuseqarnerusinnaapput, MIPI-p nalunaarusiaa nutaat naqissusiivoq.

Meeqqat ilaqutariinnit aningaasakilliortuneersut inuunernerminni arlalitsigut naammaginartumik atugassaqartitaanatik inuupput. Tamanna nalunaarusiami "FN-ip Meeqqat Piginnaatitaaffii aamma meeqqap inuuninarnermini naammaginartumik atugassaqartitaanera" MIPI-p (Namminersornerullutik Qartussat Meeqqat Inuusuttullu pillugit qitiusumik Ilisimasaqarfiat) saqqummerseqqammigaani isummiussaq pingaarneq nalunaarpoq.

Kalaallit Nunaanni meeqqat ilaqutariinni aningaasakilliortuni inuusut misigaat, angajoqqaatik nerisassanik inuussutissaqarluartunik naammattunik, naammatiginartunik atisaqarnissaminnut naammaginartumillu inissaqarnerminnut akissaqanngitsut. Aamma aningaasakilliorneq peqqutigalugu inuit akornanni sammisassanut aningaasanik nalilinnut peqataasinnaanermut periarfissaqanngillat. Atortussatigut inuillu akornaniinnissamik amigaateqarnerup kinguneranit meeqqat ineriartornerat killeqalersarpoq.

Nalunnarusiami nassuerutigineqarpoq, meeqqat inuuniarnikkut atugaasa pitsaanerulernissaat anguniarlugu oqartussaasut suliniutinik arlalinnik aallartitsisimasut. Peqatigitilluguli nalunaarusiami isummiunneqarpoq, oqartussaasut Meeqqat Piginnaatitaaffiannik isumaqatigiissummut tunngatillugu pisussaaffini eqqortissinnaaniarunikkit iliuuseqarnerusinnaasut. Tassunga atatillugu nalunaarusiami naqissuserpaa, ilaqutariit aningaasakilliornermikkut meeqqat ineriartornerannut pisariaqartitaannut meeqqat nerisassatigut, atisassatigut aammalu naammaginartumik íneqarnissaasigut kiisalu inuit akornanni sammisassanut assigiinngitsunut peqataasinnaanerannut mattussinnginnissaat anguniarlugu oqartussaasut sapinngisamik piaartumik iluaqutaalluartumillu qularnaarinninnissaminnut pisussaaffeqartut.

Meeqqat Piginnaatitaaffii pillugit FN-ip isumaqatigiissutaa Kalaallit Nunaata 1992-imi atsiorpaa. Meeqqat Piginnaatitaaffiinik isumaqatigiissut nunat tamat akornanni isumaqatigiissutaavoq, nunanullu taassuminnga atsortuusimasunut inatsisitigut pituttugaaffiusuulluni.

Powered by Labrador CMS