Meeqqat pillugit nalunaarusiat pingajuat takkutissaaq
Kalaallit Nunaanni meeqqat inuuniarnerminni atugaat pillugit nalunaarusiat immikkoortuisa kingullersaat sisamanngorpat saqqummissaaq. Nalunaarusiami meeqqat piginnaatitaaffii FN-llu meeqqat piginnaatitaaffii pillugit isumaqatigiissutaat pingaarnerutillugit sammineqarput.
MIPI-p - Namminersornerusut meeqqat inuusuttullu pillugit qitiusumik ilisimasaqarfiata - nalunaarusiaa "FN-ip meeqqat piginnaatitaaffii pillugit isumaqatigiissutaa meeqqallu inuunermini naammaginartumik atugassaqarnissamut piginnaatitaaffia" sisamanngorpat novembarip 1-iani saqqummissaaq.
Nalunaarusiami sammineqarput meeqqat ilaqutariinnit aningaasakilliortuniittut taakkulu FN-ip Meeqqat pillugit isumaqatigiissutaa naapertorlugu naammaginartumik inuuneqarnissamut pisinnaatitaaffii. FN-ip Meeqqat piginnaatitaaffii pillugit Isumaqatigiissutaa meeqqallu inuuniarnermini atukkamini naammaginartumik atugassaqarnissamik piginnaatitaaffia Kalaallit Nunaanni meeqqat inuuniarnikkut atugaat pillugit nalunaarusiat nangeqattaartut pingasuusut kingullersaraat.
Nalunaarusiap pisortatigoortumik saqqummiunneqarneranut atatillugu nalunaarsiortut pingaarnersaata Steen Wullf-ip nalunaarusiap imai isummiussallu pingaarnerit saqqummiutissavai. Nalunaarusiat aamma mipi-p nammineq nittartagaani sisamanngorpat novembarip 1-ianiit download-erneqarsinnaalissaaq.
MIPI-p Kalaallit Nunaanni meeqqat inuuniarnikkut atugaat pillugit nalunaarusiat immikkoortuisa nr. 2-at septambarip 1-iani saqqummerpoq. Nangeqattartuni nalunaarusiat siullersaat 2007-imi maajimi saqqummerpoq.