Ilisimatusarneq amigarpoq
Psykologii kitaamiorpalaartoq Kalaallit Nunaanni atussallugu ajornakusoorpoq. Maani kulturi kitaanilu kulturi psykologiip tungaatigut qanoq assigiinngissuteqarnersut ilisimatusaatigineqanngippallaartoq, inuit pissusiinik ilisimasalik oqarpoq.
Kitaamiut univertitetianni psykologimik ilinniarsimalluni Kalaallit Nunaanni sulinissaq ajornakusoorsinnaasarpoq. Kulturikkut assigiinngissutsit pissutaallutik psykologimi sakkussat inunnut Europap kitaani peroriartorsimasunut naatsorsuussat atoruminaassinnaasarmata.
– Psykologi kitaamiorpalaartoq allatut ittunik tunngavissaqarluni ineriartortinneqarsimavoq, ilaatigullu kalaalliinut atornissaa ajornartorsiornarsinnaasarluni, Qaqortup kommuniani psykologiullunilu inuussuttunik siunnersuisartoq Dorthe Chemnitz oqarpoq.
Isumaqarpoq Kalaallit Nunaanni pissutsit peqqutaallutik inuup pineqartup eqqarsartaatsikkut atugai kisiisa tunngaviginagit inuttulli attuumassuteqarfigisat ilanngullugit suliffinissaat pisariaqartartoq. Tamanna pisariaqarpoq maani inuiaqatigiinni ikittuni imminnut attuumassuteqarfigeqatigiittorujussuarni inuugatta Europamisuullu imminnitsinnut avissartuussimasuunnginnatta.
– Ajornartorsiutit qanoq iliorluni iluarsiniarnissaat nalorninarsinnaasarpoq, soorlu assersuutigalugu inuusuttup ilinniagaqartup angajoqqaallu ilimagisaasa akornanni aporaannerit angajoqqaaniit avissaarniarnerinnarmik peqquteqartanngillat, tassanilu assigiinngitsut arlallit suleqatigissinnerisigut aaqqiiniartoqartariaqarpoq, Dorthe Chemnitz oqarpoq.
Sermitsiaq atuaruk.