Namminersornerullutik Oqartussat piviusulersaarummut isumaqataanngillat

KIIIP-ip ilinniartut qassiunerinit kisitsisit atorfilittamit piviusalersaarummi ”Kalaallit Nunaannit qimaaneq”-mit taaneqartut akerlerpai”.

DR-ip piviusulersaarutaanut Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik akerliliivoq. Tusagassiorfinnut nalunaarummi Namminersornerullutik Oqartussat nammineerlutik atorfilittaata kisitsisinik saqqummiusinera akerlilerpaa.

- Suliffeqarnermut Inuussutissarsiutinullu Ilinniartitaanermut Pisortaqarfimmi siunnersortip ilinniartitaanerni piareersarfiusuni ilinniarnerminnik ukiuni kingullerni tallimani unitsitsiinnartartut amerliartornerarlugit eqqunngitsunik paasissutissiinera Pisortaqarfiup (KIIIP, aqqi.) ajuusaarutigaa.

Tamanna eqqunngilaq, KIIIP tusagassiorfinnut nalunaarpoq erseqqissaatigalugulu ilinniarnissamut akuerineqartut 55,1 %-ii 2001-imi ilinniakkaminnik naammassinnissimasut. Ukiut tallimat kingorna 2006-imi ilinniartut 59 %-iusut ilinniakkaminnik naammassinnissimallutik 2007-imi 61 %-itit, juunimi kisitsisit DR-ip immissuinerata nalaani ilisimaneqanngillat.

Aallakaatitassiami oqaatigineqarpoq ukiumi ilinniaqatigiit 1,7 %-iinnaat 'ilisimatusarnertut qaffasissusilimmik' ilinniakkaminnik naammassinnittartut, tamanna KIIIP-mit uppernarsinneqarsinnaangitsutut illuatungilerneqarpoq. Pisortaqarfiullu nassuerutigalugu oqaatigaa 'Ilisimatusarnertut qaffasissusilimmik' ilinniarnerit qanoq nassuiarneqarsinnaaneri tamatumani apeqqutaasoq.

'Ilisimatusarnertut qaffasissusilimmi' ilinniartitaanerit ingerlaqqiffiusut pineqarsimappata oqaatigineqartut eqqorsimassanngillat, KIIIP allappoq. Ukiuni 2002-2006-imi inuit 600-t ilinniakkamik ingerlaqqiffiusumik naammassinnissimapput, taakkulu inuusuttunut ilinniaqatigiinnut 15%-iusunut inunnut 1000-it missaanniittunut naapertuuppoq. Tamatuma akerlianik ilumoorpoq 2 %-ingajaat ilinniakkamik kandidatitut qaffasissusilimmik naammassinnissimammata, KIIIP allappoq.

Powered by Labrador CMS