Takornarianut kinguneqaatissaa ersissutigineqarpoq
DR-p aallakaatitassiaata angalatitseqatigiiffiit ilaat, ukiuni kingullerni Kalaallit Nunaannut annertuumik takornariaqartitsiniartarsimasut, annilaangatilersimavai, nutaarsiassaqartitsivik Travel People Newsletter allappoq.
Angalatitseqatigiiffissuit arlallit, ukiup ataatsip ingerlanerani angalasunik arlalinnik tusintilinnik Kalaallit Nunaannt angalatitsisartut, ullumikkut ersissutigaat aallakaatitassiaq takornariaqarnermut malunnaatilimmik sunniuteqassasoq, nutaarsiassaqartitsivik ullumi allappoq, allaaserisanili uppernarsaatissaqartinnagu, assersuutigalugu angalanernik aaqqissuussisartunik pineqartunik issuaanikkut.
TPN isumaqarpoq TV-kut piviusulersaarut ´Flugten fra Grønland` Kalaallit Nunaata ilulissanik, piniartunik qimussinillu alutornartinneqarneranut akerliulluinnartoq, imaali, piviusumik isigalugu, nutaartaqarani.
- Aallakaatitassiaq nikallornartorujussuusoq qularutissaanngilluinnarpoq. Taamatulli oqareerluni aamma aperisariaqarpoq: Aallakaatitassiaq sumilluunniit nutaartaqarpa, ukiorpassuarni pissusiviusut qanoq issimanerannut sanilliullugu?
Nutaarsiassaqartitsivik allappoq qallunaat politikerit atorfillillu nuimasuut ikinnerpaamik 50-it qaammatini kingullerni 12-ini Kalaallit Nunaannut tikeraarsimasut.
- Tamanna tunuliaqutaralugu tupinnarluinnarpoq politikerit Danmarkimi politikkikkut partiinit tamangajavinneersut aallakaatitassiap aallakaatinneqarnerata kingorna tulleriiaaginnavillutik assatik salinniarmatigit nunasiatoqqamilu pissutsinut uippallernerarlutik. Partii naalakkersuisuusoq Venstre partiilu naalakkersuisunik tapersersuisoq Dansk Folkeparti nalunaarput Danmarki ingerlaannavik akuleruttariaqartoq. Sallersaatillugu meeqqanik assilisat, angajoqqaavi aalakoortorujussuit, mamiasutsitsipput. Dansk Folkepartineersoq Søren Espersen ima sualutsigisumik qisuariarpoq, piumasaralugu Namminersornerullutik Oqartussat aqunneqalissasut!
- Politikerit atorfillillu tikeraartartut saniaitgut Kalaallit Nunaanni aqutsinerup annersaa qallunaanit atorfilinnit akademikerinit ingerlanneqarpoq, kalaalerlu inuinnaq ullumikkut aperissaaq sooq Kalaallit Nunaannut pisortatigoortumik tikeraartartut tamakkua nunarsuarmi qeqertat annersaannut tikeraareernermik kingorna mianersoqqussuteqartarsimannginnersut. Tamarmik mittarfimmut aaneqartarsimanavianngillat biilinillu saagulinnik akunnittarfimminnut biiliunneqartarlutik, tamatumalu kingorna akunnittarfimmi ataatsimiittarlutik, naggataatigullu mittarfimmut biiliunneqartarlutik, taxanik aamma saagulinnik.
- Nuummi Hotel Hans Egede, illoqarfiup akunnittarfissua, najugaqarfissuit, TV-kut aallakaatitassiami takutinneqartut, eqqannguanniippoq; akunnittarfiullu akinnguaniippoq Brugseni, imerajuttorpassuit imigassarsiniartarfiat, amerlanertigullu isaarissamut aniinnavillutik imigassarsiatik imilertarpaat. Nuummut tikeraartut tamangajavissuarmik Hotel Hans Egedemi, illoqarfiup ajortortaanut toqqaannartumik isikkivilimi, najugaqartarmata ilimananngilluinnarpoq qallunaat politikererpassuit atorfilippassuillu inuiaqatigiinni kalaallini ajuutinik malugisaqarsimannginnerat, nutaarsiassaqartitsivik Travel People Newsletter allappoq.