Samet kattuffiata Danmark isornartorsiorpaa
Samet sverigemiut kattuffiata »Sami Ätnam«-ip qallunaat nunasiaatilersornerat isornartorsiorpaa.
Nuna tamakkerlugu kattuffiup DR-ip piviusulersaarutaata "Kalaallit Nunaanniit qimarranneq"-rup kingorna Namminersornerullutik Oqartussat nammineersinnaajunnaarsinneqarallarnissaat Dansk Folkepartiip piumasaqaataa qisuariaateqarfigaa.
- Dansk Folkepartiip Kalaallit Nunaat nammineersinnaajunnaasikkallarniarpaa. Kalaallit Nunaanni inuuniarnikkut annertuumik ajornartorsiortoqarnera tamatumunnga tunngaviuvoq, taamaalilluni DF isumaqarpoq angut qaamasumik amilik aaqqiiniarnissamut pikkorinnerusoq, Same Ätnam-ip siulittaasua Lars-Nila Lasko allappoq.
Taanna isumaqarpoq, taamaaliorneq inuit nunaannik nunasiaateqaleqqinnertut taaneqarsinnaasoq, taamaaliornikkullu aamma Danmarkip Qalasersuarmut taamalu aamma siunissami gasimit uuliasiornermillu isertitassanik aqutsisinnaalernissamut periarnerulluni.
- Danmarkip ernummatigaa Kalaallit Nunaata namminersulivinnissamik nalunaaruteqarsinnaanera, taamalu gas-imit uuliamillu pisuussutit tamakkiisumik aqutarilernissaat piumasaralugu, Lars-Nila Lasko tusagassiuteqarfinnut allappoq.