Meeqqanut ikiuukkiartornissaq neqeroorutigaat
Meeqqanut sumiginnakkanut isumaginniffittut ulloq unnuarlu angerlarsimaffiup Magnoliegården-ip Stevns Kommunemiittup kalaallit meerartaat navianartorsiortinneqartut pillugit TV-kkut piviusulersaarutaata kingorna ikiuunnissamik immikkullu ilisimasaqarnertik neqeroorutigaat, Dagbladet Køge allappoq.
Aallakaatitassiami DR1-imi pingasunngormat unnukkut aallakaatinneqartumi saqqummiunneqarpoq, Kalaallit Nunaanni meeqqat tamarmiusut sisamararterutaat imminoriaraluartarsimasut, aammalu kalaallit niviarsiarartaasa tamarmiusut pingajorarterutaat kinguaassiutitigut atornerlunneqartarsimasoq.
- Taamaammat uanga nunap iluani pissutsinut ministerimut Lars Løkke Rasmussenimut allagaqarniarlunga aalajangersimavunga, pinartoqartillugu ikiuukkiartorsinnaaneq neqeroorutiginiarlugu. Saaffiginnissutip tassunga nassiunneqarnissaanut peqqutaavoq, taanna oqarmat qanoq iliuuseqartoqartariaqartoq. Taamaattumik neriuutigaara taassuma saaffiginnissuterput kalaallit Nunaanni namminersornerullutik oqartussanut ingerlateqqikkumaaraa, Magnoliegården-imi pisortaasoq Vibeke Gaarde oqarpoq.
Taassuma takorloorpaa sulisorisani amerlanngitsut kalaallinut suleqatiminnut ikiuukkiartortillugit aallartinniarlugit.