Qineqqusaarnerit Sisimiuni aallartipput
Folketingimut qinersinissamut atatillugu qinersisartunik ataatsimiititsinerit siullersaat Sisimiuni ippassaq unnukkut ingerlanneqarpoq, illoqarfinnullu arlalinnut aallakaatinneqarluni, knr.gl allappoq.
Partiit qinigassanngortitsisut sisamaasut tamarmik immikkut qinigassanngortitatik marluusut Sisimiut katersortarfiani qineqqusaartippaat, aqutsisuusoq Peter Aqqa Lyberth, Sisimiut Tusaataaneersoq qinersisartunillu ataatsimiititsinermi aaqqissuisuusoq naapertorlugu inuit 40-t missaanniittut takkussimapput.
Ataatimiinneq Sisimiuni, Paamiuni, Maniitsumi Aasiannilu illoqarfiit raadioisigut aallakaatinneqarpoq, taamaammat Sisimiut katersortarfiani najuuttunit 40-sunit amerlanerujussuit oqallinnermut tusarnaartuupput, ilaatigut apeqqutit silaannaap pissusaanut, arfanniarnermut Thule Air Base-mullu tunngasuupput.
Taaneqartullu saniatigut aamma Demokraatit imaluunniit Atassut Folketingimut qinersinermi isertitaqassagaluarpata Nunat atlantikup Avannaamiut Suleqatigiiffiata Folketingimi siunissaa oqallisigineqangaatsiarpoq, Peter Aqqa Lyberth oqaluttuarpoq.
Demokraatit oqaatigereerpaat, Folketingimut isertitaqassagaluarunik De Konservative-nik suleqateqassallutik, Atassutikkullu Venstre-nik suleqateqarniarlutik. Siumut aamma IA Nunat Atlantikup avannaamiut Suleqatigiiffianni sulinertik ingerlatiinnarniarpaat.
Qineqqusaarnerit Sapaatiuppat Qaqortumi qinersisartunik ataatsimiitsitsinermik ingerlateqqinneqassapput.