Meeqqat inuusuttullu pillugit atuagaq nutaaq

MIPI-p (Meeqqat inuusuttullu pillugit qitiusumik ilisimasaqarfik) ataasinngorpat atuagaq »Meeqqat inuusuttullu Kalaallit Nunaanni- katersat« saqqummersissavaa.

Katersat MIPI-p Ilisimatusarfimmi ilisimatusartut atuakkanillu saqqummersitsivik peqatigalugit suliarisimasaata imarai meeqqat inuusuttullu piviusuutitaasa ullumikkut ilisarnaataasa nassuiaataat paasissutissanillu misissueqqissaarnerit. Atuakkiortut arlallit sammisaq pingaarnermut - tassa kalaallit meerartaasa inuusuttaasalu ineriartornissaannut periarfissat inuuniarnikkullu atigaat - tunngatillugu tamarmik immikkut ilisimasaqarfimminnik ilanngussisarsimapput.

- MIPI-p neriuutigaa, atuagaq ilinniarfinni meeqqanik inuusuttunillu sammisaqarfiusuni ilinniartitsissutitut atorneqarsinnaajumaartoq, pineqartup iluani sammineqartartut qangaanerusut ullutsinnilu sammineqartartut ersarinnerulersissagaat, taamaalillunilu Kalaallit Nunaanni meeqqat inuusuttullu pillugit "tikkuussummik" takussutissiisinnaalissasoq, meeqqat inuusuttullu iluanni ilisimasanik nutarterissasoq aammalu susassaqartut akornanni suliassaqarfiit/isumaginniffeqarfiit akimorlugit oqallitsitsinermik pilersitsisinnaassasoq aammalu kalaallit nunaanni inuiaqatigiinni allannguutit meeqqanut inuusuttunullu sunniutaasa suliassaqarfitsigut aammalu isumaginninnerup iluani politikkikkut paasinnissinnaanermut ilapertuusaasinnaanissaa.

Atuagaq ilinniagaqarfinnut, immikkut meeqqanik inuusuttunillu sulialinnut politikerinullu saaffiginnittuuvoq.

Katersat kalaallisuua 440-nik quppernilik qallunaatuualu 380-inik quppernilik saqqummissaaq, Kalaallit Nunaanni Danmarkimilu atuagaarniarfiit aqqutigalugit tuniniarneqassalluni.

Powered by Labrador CMS