First Lego League-mi kalaallit pissartanngorniuttut
2006-imi iluatsittumik aallartereersorlu Nuummiut First Lego League-mi pissartanngorniunnissamut piareertut Berit Mortensen Nuummi aqutsisuneersoq oqaluttuarpoq.
Atuartut First Lego League-mi pinngortitamik ilisimatusarnermi robottinillu teknikkilerinermi unammisapput. Pissartanngorniutivinneq sapaatit akunnerinik arfineq-pingasunik sioqqullugu atuartut suliassartik, teorimut assassornertaanullu tunngasut, naammassiniarsaraat.
Nuup atuarfiini 9. klassemi atuartut unammeqataasullu marlussuit sunngiffimminni peqataapput, katillugit atuartut 100-it sinneqarlutik.
Pissartanngorniutivinneq arfininngornermi novemberip qulinganni Kangillinnguit atuarfianni pissaaq.
Atuartut suliamik inernerat taamaasinerani saqqummiutissavaat robottimillu unammissallutik, aammattaaq isiginnaartunut aliikkusersuimaarlutik. Nalunaaqutaq qulinut isaareerunik robottimik unamminerit siulliit aallartissavaat.
Nalunaaqutaq 14.30 pissartanngorniutivissapput.
Ukiormannaq naammassiniagassat tassaapput Power Puzzle, allaanerusunik nukissiuuteqarneq - nunarsuarmiut pisariaqartitaannik naammassinniffiusoq.
Inuit ataasiakkaarluta nukissiuutinik toqqaanerput pinngortitamut, aningaasaqarnermut nunarsuarmilu inuunermut qanoq sunniuteqartarpa? Illup kiassarnera, biilit umiatsiaallu orsussaat, oqarasuaatit angallattakkat orsertarnera, qarasaasiap innaallagialersornera MP3-nilluunniit nusooriniarnitsinni nukissiuutissamik toqqaajuarpugut. Nukissiuutit suut atortariaqarpagut aamma sooq?
Suliassaq atuartut aallartippaat nukissiuutissamillu qanoq piiaasarneq aamma atuisartut atugassaminnik toqqaasarnerisa nunarsuatsinnut ullumikkut, aqagu siunissamilu inooriaasitsinnut qanoq sunniuteqartarnersoq misissorlugu.
FIRST LEGO League tassaavoq teknikki pillugu meeqqanut unammisitsineq FIRST Scandinaviamit aaqqissuunneqartoq. Meeqqat pinngortitamik ilisimatusarnermik teknikkilerinermik matematikkimik sammisaqarnerulernissaat aaqqissuussisartut siunertaraat.
Unammeqatigiit nunarsuarmi tamaneersut 10.000-it sinnerlugit ukioq manna unammeqataassapput.
FLL Nuup Kommuneani meeqqanut kultureqarnermullu ingerlatsiviup aaqqissuussaraa INUTEK suleqatigalugu.
Ajugaasut sapaatit akunnerit pingasut qaangiunneranni Herninngimi skandinaviamiut pissartanngorniutivinnerannut peqataanissamut aningaasassarsiortoqarpoq. Taamanikkussamut kalaallit erfalasuat Norgemiut, Sverigemiut, Qallunaat Savalimmiormiullu unammeqataasut akornanni takutikkusupparput.