Qinersiartortut allanngorarput
Narsami, Qaqortumi Ilulissanilu qinersiartortut qiimapput, KNR tusarliivoq.
Folketingimut qinersineq Narsap katersortarfiani qulingiluanut ammarneqarmat Narsarmiorpassuarnit najuuffigineqarpoq. Kingullermik Folketingimut 2005-imi qinersisoqarmat qinersisinnaasunit 1.258-nit 844-t, procentinngorlugit 67,2 procentit qinersiartorsimapput.
Narsami qinersisinnaasut 1.192-pput nal. 11.00-inngortoq 22,7 procentii qinersiartoreersimapput, 2005-imi nalunaaqutaq taamaalimmat qinersisartut 19,6 procentii qinersiartorsimapput.
Qinersiartortut amerlasuut sorlermik taasissanerlutik qularutiginngilaat, aammalu ilaqarput qinertakkaminnik taasisimasut.
Qaqortumi qinersisinnaasut 2321-iupput. Nal. 11.00 382-it qinersiartorsimapput, procentinngorlugit 16,5 procentiullutik, 2005-imi taamaalinerani 16 procentiupput.
Qaqortumi sila qulisimagaluarluni silagissutut oqaatigineqarsinnaavoq. Qinersisoqaraangat qinersiviup katersortarfiup eqqaani partiit assigiingitsut ullaarnganiit kaffillertaraluarput, ullumikkullu taamaaliortoqanngilaq, kingusissukkulli kaffillertoqalissasoq oqaatigineqarpoq.
Ilulissani qinersisinnaasut 9,7 procentii nal. 11.00 qinersiartorsimapput. 11,7 gradenik issilluni anorlilaarmat qiianaaluttukasiugaluartoq qinersiartortut qiimaqisut pissangarpaluttullu, ullaarli qinersivik ammarmat ineeqqat qinersiviit inoqaannavittut, qinersisitsisut ilaata Evnike Thorningip oqaatigaa.