OECD: Ingerlatsineq pillugu inatsit ajornartorsiutitaqanngilaq

Ingerlatsineq pillugu inatsisissap nutaap akuerineqarneratigut Kalaallit Nunaat OECD-p maleruagassaanut malinnaasinnaanngitsoq Ilisimatusarfimmi ilinniarnertuut oqarput. Inatsit akuerineqarpat ilisimatusarfimmi rektori, prorektori immikkoortortallu aqutsisui ilisimatusartuusariaqanngillat.

OECD-lli atuartitaanermut pisortaqarfiani Parisimiittumi 'Indicators and Analysis Division'-ip aqutsisuata Andreas Schleicher-ip inatsisissaq akornutissaqannginnerarpaa. KNR-imi radioaviisi taama oqaluttuarpoq.

- Ilisimatusarfiit aqutsisui siunissami aamma ilinniagartuussagatippakka, allaffissornermilli aqutsisunik atorfinitsitsisalernissaq ilisimatusarfinnut nutaanik periarfissiissaaq. Tamanna ajornartorsiutitaqarsorinngilara eqaannerusumilli periuseqarsinnaanissaat ammaaffigineqassaaq, ilisimatusarfiimmi piukkunnarnerusunik atorfinitsitsisinnaalissapput, oqarpoq.

Ilisimatusarfiit siusinnerusumi ilinniagartuunik aqutsisoqartarput, ullumikkulli allaffissornermik ingerlatsisunik aqutsisoqarneruleriartorput. Aqutsisunut piumasaqaatissat ilisimatusarfiit ataasiakkaat namminneq maleruagassiortarpaat. Aqutsisut ilisimatusartuunissaat pillugu nunat tamat akornanni maleruagassanik aalajangersimasunik soqanngilaq, Andreas Schleicher nassuiaavoq.

- Ilinniarnertuut ersissutissaqarsorinngivippakka. Ilinniarnertuut iluatsitsisinnaanerat nooriasaarsinnaanerallu eqqarsaatigalugu ilisimatusarfinnullu allanut naleqqiullugu immikkoortortaqarfiit qanoq iluatsitsigisumik ingerlanerat apeqqutaassaaq aqutsisunut piumasaqaatit apeqqutaanatik. Taamaammat innuttassinnut akimmiffimmik pilersitsisoqarnissaa takusinnaanngilara. Aqutsineq qanorluunniit ikkaluarpat ilisimatusarfinni pitsaasuni ilinniarnertuut Kalaallit Nunaanni - aamma allami - periarfissaqarsinnaapput. Ilisimatusarfiit nutaaliat aqutsisunik pisinnaasunik, ilinniagartuuinnaanngitsunik allaffissornermili aqutsisinnaasunik, pissarsiortartussaapput, oqarpoq.