Aalisartut piniartullu ulluat
Immikkoortortaqarfiit kajumissaarneqarput oqariartuutissaminnik piareersaqqullugit.
Aalisartut piniartullu sisamanngorpat tulliani 15. november pisarnertut ullorsiussapput.
KNAPK-p immikkoortortaqarfini 72-iusut kajumissaarpai ulloq aaliangersimasumik oqariartuuteqarfigeqqullugu nutaarsiassaqarfiit aqqutigalugit.
- Nunarput isorartoqimmat ataasiinnarmik oqariartorfigissallugu ajornassaaq, taamaattumik immikkoortoqarfinni siulittaasut imaaluunniit siulersuisut ilaasortat peqatigalugit oqariartuuteqarnissaat matumuuna kajumissaarutigaarput, KNAPK-p psiortaa John Biilmann kajumissaarivoq.
Assersuutigaa Nuummi immikkoortortaqarfiup kajumissaarutigisimagaa tunitsiveqarniarneq, ingammik aasaanerani saarulliit nalaanni, kiisalu aalisakkat akii pitsaanerusut oqariartuutigeqqullugu.
Nuummi aalisartut piniartullu ulluat nal. 10.00 naalagiaqatigiinnermik aallartissaaq. Tamatuma kingorna imaani ajunaarsimasut eqqaassutissaat kransilerneqassaaq, katersortarfimmi kaffillertoqassalluni nalunaaqutarlu 13.00 ingerlaaqatigiittoqassalluni KNAPK-p allaffianiit Namminersornerusunut, tassani ilaatigut siulittaasoq Peter Olsen oqaaseqassalluni.
Unnukkut Nuup katersortarfiani nal. 18.30-miit nalliuttorsiortoqassaaq.
Nutaatut kattuffiup siulittaasua Peter Olsen ullaakkut nal. 7.00-p kinguninngutigut KNR-Radiukkut oqaaseqassaaq.