Kujataa misissuiffigineqarpoq
DMI RUC-lu silap allanngorarneranik Kujataanilu innuttaasunut sunniuteqaataanik annertuumik ilisimatusarnermik suliniuteqarput.
1950-imiilli Danmarks Meteorologiske Institutip Kujataani sikorsuit malinnaaffigisarsimavai. Sikorsuarnut assammik assiliat maanna digitalinngortinneqassapput, tamannalu peqatigalugu Kujataani innuttaasunik apersuilluni misissuinerup takutissavaa, ukiuni kingullerni 57-ini pinngortitap allanngorarneranut innuttaasut qanoq isillutik naleqqussartarsimanersut.
– Takuniarparput allannguutit piniarnermut aallisarnermullu qanoq sunniuteqarsimanersut, aammalu aalisratut piniartullu ukiut ingerlanerini allanngornernut qanoq naleqqussartarsimanersut, lektor Rasmus Ole Rasmussen, RUC-meersoq, oqarpoq, taassumalu taqqavani piffissami 1950-imiit ullumimut inuiaqatigiit suliaannik paasissutissanik katersuineq nalunaarsuinerlu aquppaa. Misissuinerup inuiaqatigiinnut tunngasortaani ilisimatuut katillugit tallimat RUC-meersut Sisimiuneersullu peqataapput.
Misissuineq oktoberimi aallartinneqarpoq, ilisimatuullu ilaasa, Sigrid Rasmussenip, manna tikillugu aalisartut piniartullu arfineq-pingasut kiisalu Nanortalimmi suliffiit assigiinngitsut apersorsimavai.
– Silap allanngorarnera inuit, manna tikillugu naapissimasatta, tamarmik malinnaavigaat. Kikkut tamarmik oqaluuseraat, Sigrid Rasmussen Sermitsiaq.gl-imut oqarpoq.
Misissuineq nutaaq tamanna ukiup ataatsip missaani ingerlanneqassaaq Kalaallit Nunaanni Ilisimatuussutsikkut Kommissionimit tapersersorneqarluni. Piniartut, aalisartut, suiffeqarfiit ingerlatsiviillu saniatigut misissuinermi sammineqassapput kujataani inuusuttut tamakkualu siunissamut naatsorsuutigisaat. Suliniut ilaatigut aallaaveqarpoq Namminersornerullutik Oqartussat piniartuunermik misissuinersuannit, 2005-imi Rasmus Ole Rasmussenimit ingerlanneqartumik.