Inini kikkunnilluunniit iserfigineqartartuni pujortaneq inerteqqutaalissaaq

IA-mi ilaasortap Juliane Henningsip inini kikkunnilluunniit isersimaffigineqartartuni tamani, soorlu neriniartsarfinni, caféni imerniartarfinnilu pujorqaqqusiunnaarnissamut siunnersuutigaa, Siumumeersup Doris Jakobsenip siunnersuutigaa, inini tamakkunani immikkut pujortartarfinnik initalersuinissaq piumasarineqassaoq, taamaalilluni pujortartartut pujortarnerlu ajortut tamarmik akornusersuunnatik isersimasinnaassammata.

Peqqissutsimut naalakkersuisup Arkalo Abelsenip erseqqissaatigaa, naalakkersuisuni maannamut isumaasimasoq, Nuummi neriniartarfinni nammineq kajumissusertik naapertorlugu pujortartartunut immikkut isersimaffissianik sanaqullugit. Tamanna neriniartarfinni angisuuni ajunngitsumik ingerlasimavoq, kisianni arealimikkut mikinerusuni ajornarnerusumalluni. Taakkunani pujortarneq ajortut pujumit pujortartarfinneersumit akornusersorneqartarsimapput.

Arkalop ilannguppaa nerisassanik sassaallerfiusartuni tamani pujortaqqusiunnaarnissamut naalakkersuisut piareersimasut. Kisianni aamma pujortaqqusiunnaarnerup malitsinniarneqarnissaa ajornakusoorsinnaasoq siulittuutigaa. Tassami isertortumik pujortartoqartarnersoq nakkutiginiarneqarnissaa politiit suliassarinngilaat.

Partiit tamarmik pujortaqqusiunnaarnissamik eqqussinissamut erseqissumik isummaminnik nalunaanngillat, aamma imerniartarfinnut tunngatillugu. Demokratit taamaattuni pujortartarneq suli atuutsikkusuppaat, Atassutikkormiut imerniartarfiit sassaallertarfianni tamani pujortartarunnaavinnissaq kissaatigigaat, KNR allappoq.