Pisinnaatitaaffivut maanna sorsuutigissavagut
Silap allanngorarneratigut Kalaallit Nunaannilu aatsitassamik piiaalernikkut pisinnaatitaaffiit iluamik tatineqalissapput, Aqqaluk Lynge ullumikkut 60-iliisoq oqarpoq.
?Kalaallit Nunaat imatut inissisimalersimavoq, namminersulernissamut aningaasaliissutinik nassaartoqassalluni, ilaatigut uuliamik qalluinikkut aatsitassarsiornikkullu. Inuilli Canadami Alaskamilu misilittagaasa takutippaat maanna pisinnaatitaaffivut qulakkeertariaqarivut avatangiisillu illersorlugit, Aqqaluk Lynge oqarpoq, taannalu 1980-imiilli Inuit kattuffianni ICC-mi ilaasortaasimavoq.
Uuliaarukkaangat aatsitassaarukkaangallu uuliasioqatigiiffissuit avatangiisit pilersinneqaqqissinnaajunnaarlugit qimattarpaat. Tamanna taamaallaat Amerikami Kujallermi kiattup orpippassuini tikikkuminaatsuni pineq ajorpoq. Tamanna issittumi ilisimaneqarluarpoq, tamannalu Kalaallit Nunaanni atugaalersinnaavoq, maanna pisuussutinik uumassuseqanngitsunik aningaasarsiornialeruttortumi.
– Maannakkut pisinnaatitaaffivut sorsuutigilissavagut, pissutigalugu nalunaarutit naammanngimmata. Sorsuutigineqassaaq nalunaarutit pisinnaatitaaffiillu malinneqarnissaat, Kalaallit Nunaanni ICC-p præsidentia Aqqaluk Lynge Sermitsiamut oqarpoq.