Hans Peter Poulsen siulittaasunngorusuppoq
Siulittaasunngorniulluni unammisoqassaaq timersoqatigiit kattuffiat GIF ileqquusumik ataatsimeersualerpat arfininngorneq oktoberip 13-iat.
Maanna GIF-imi siulittaasoq Nuka Kleemann siulittaasussarsiornissami sassaqqinniarpoq Hans Peter Poulsen-imillu volleyball-ertartut kattuffiannit KVK-mit sassartinneqartumit unammillerneqassalluni. Tamanna avammut nalunaarutigineqarpoq oktoberip 13-iani Nuummi ileqquusumik ataatsimeersuarnissamut najoqqutassat agguaanneqarmata
Nuka Kleemann siornatigut Tae Kwon Do-rtartut kattuffianni siulittaasuusoq 2003-imi siulittaasunngorpoq siulittaasutut kingoraagaa Pâviâraq Heilmann nammineq kissaateqarnermigut tunuarmat. Ulluinnarnilu aqutsisut Nuka Kleemann maanna sassarteqqippaat.
Hans Peter Poulsen siornatigut assammik arsartartutut ilisimaneqartoq volleyball-ertartut kattuffiannit sassartinneqarpoq.
Ileqquusumik ataatsimeersuarnissami taasisinnaallutik peqataasussat 29-iupput kattuffiit tamarmik immikkut pingasunik taasisinnaasortaqarlutik kiisalu ulluinnarni aqutsisut tallimanik taasisinnaasortaqarlutik.
Unammisoqassaarlu aamma ulluinnarni aqutsisunut inissat marluk qinerneqalerpata. Inissat ullumikkut Riikki Biilmann-ip aamma Frederik Lundblad-ip tigummisaat qinersissutaassapput. Taakku marluk ulluinnarni aqutsisunit sassartinneqaqqissapput arsaattartullu kattuffiata Lars Lundblad sassartissavaa eqqaaneqareersutullu marluinnaat qinerneqartussaapput.