Aaqa Qinngutsinni
Ullukkut unnukkullu tarnimikkut nappaateqartunut paaqqinnittarfik Sungiusarfik Aaqa Qinngutsini aappaagumiit nutaamik immikkoortortaqarfeqalissaaq. Immikkoortortaqarfik skizofrenimik nappaateqartunut atornernerluisuusunut angerlarsimaffittut naatsorsuussaavoq
Ullukkut unnukkullu inersimasunut tarnimikkut nappaateqartunut paaqqinnittarfik ”Sungiusarfik Aaqa” Nuummi illoqarfiup ilaanni Qinngutsinni 2008-mi immikkoortortaqarfeqalissaaq nutaamik. Immikkoortortaqarfik nutaaq skizofrenimik nappaatillit saniatigullu atornerluinermik ajornartorsiuteqartunut angerlarsimaffittut naatsorsuussaavoq. Aaqami najugaqartut affaasa missaat imigassamik ikiaroornartumilluunniit ajornartorsiuteqarput.
–Aaqami najugaqartut ilai anigorsinnaanngisaminnik atornerluisuusarput.Taakkua eqqissillutik Qinngutsini immikkoortortaqarfimmi atornerluisuunertik suliarisinnaassavaat, Aaqami pisortaq Ivalo Møller Lange oqarpoq.
Skizofrenimik nappaatillit imersimatillutik ikiaroorsimatillutillu psykoseqqajaanerusarput. Aqagutaaruloortarput tamannalu Aaqami eqqissiviilliortitsisarpoq.
–Atornerluisuunngitsut atornerluisullu immikkuulerunik pitsaanerpaamik sullissinnaallissavarput, Ivalo Møller Lange oqarpoq.
Qinngutsinni immikkoortortaqarfik nutaaq 9-10-inik sulisoqassasoq naatsorsuutigineqarpoq.