Meeqqat TV-mik isiginnaaginnartut
Kalaallit meerartaat amerlaqisut TV-mik computerimillu ikinnguteqarlutik uninngaannartuupput.
Meeqqat atugaat pillugit misissuinerup nutaap tamanna takutippaa. Narkorsaq Birgit Niclasen Statens Institut for Folkesundhed suleqatigalugu misissuivoq.
- Kalaallit Nunaanni illoqarfiit amerlanersaat meeqqat atuareernerisa kingorna sammisassaqartitsineq ajorput. Taamaammat amerlaqisut sivisuumik TV-ip computerillu saavaniittarput, tamannalu ernumalersitsivoq. Meeqqat ineriartornissaminnut unittoorsinnaapput timertik allanillu ilalersortannginnertik pissutigalugu. Tamanna kisimiittunngortitsinermik, imminut mattunnermik peqqiinnerulernermillu kinguneqartitsisinnaavoq, Red Barnetsimi aaqqissuusinermik ataqatigiissaarisoq Dorrit Hansen oqarpoq.
Red Barnet Kalaallit Nunaanni klubbinik 2002-mit ammaasalerpoq. Meeqqat inuusuttullu sunngiffimminni toqqissisimasumi assigiinngitsunik sammisassaqartinneqartarnissaannik siunertarluni ammaasarluni. Red Barnet Upenavimmi klubbimik ammaassalluni aalajangeqqammerpoq.