Nuup eqqaani silaannaap aalarulunnera timmisartumik ajunaartitsisinnaavoq
Nuup mittarfiata tallineqarnissaa ungagaannaq isigaluni aaqqiineruvoq navianarluinnartuullunilu, talliliinissamut akerliunerpaaq uparuaavoq. Kommunalbestyrelsi tamarmiulluni mittarfiup tallineqarnissaanik akuersaartoq Namminersornerullutik Oqartussanit inissitaasutut oqaatigisariaqarpoq.
Inatsisartut mittarfiup tallineqarnissaanut akuersaarnissaat qularutissaanngilaq, taamaammat Nuummi politikerit navianarluinnartumut inissittussaapput. Taama alajangerneq ungagaannaq isigaluni aaqqiineruvoq, timmisartuusissarnissamullu aamma tamanna isumannaatsuunerpaanani, illussanik titartaasartoq Peter Barfoed uparuaavoq. Taanna Nuup kujataani mittarfeqalernissamik qangalili noqqaassuteqartuuvoq.
Peter Barfoedip Air Greenland eqqaamaniagassatut pingaartitatullu apriilimi 2005-mi allagaqarnerarpaa. Allassimanerarlugu Nuup mittarfiata inissisimanera timmisartunut suluusaqanngitsunut, supoortunik motorilinnut nalequtinngitsoq, sila tamatigut ajunngitsuuaannarneq ajormat tamatumalu silaa aalaruluttarmat.
–Immikkut ilisimasallit tusaaniartariaqarput. Pissutsit pivisuut computerikkut pisuusaartitsinermit aamma allaanerujussuupput, tassaavorlu taanna politikkerinit tapersersorneqartoq, Peter Barfoed sermitsiaq.gl-mut allappoq.
Peter Barfoed DASH 7 (GL 551) avannaanit silagiqisoq juulip 24-ani mikkiartortilluni, Sermitsiap Nuullu mittarfiata akornani silaannaap putuanut pilluni navianarluinnartumik annakannajaaleraluarnera unnersuussutigaa.
DASH 7 ilioriataallaqqikkallartilluni piffissaq kingulleq atorlugu naqqippoq. Ilaasut oqaluttuarnerat naapertorlugu navianartorsiorsimanerarput. Timmisartorsuit angisuut tamanna ajunnginnerpaamik anigorsimanavianngikkaluarpaat.
Peter Barfoedip isorinnilluni allaaserisaa »The good, the bad and the ugly« atuarsinnaavat.