Illunut apeqqummi NUSUKA-p D taperserpaa
NUSUKA-p inatsisartunut inassutigaa illunik politikerinut atorfilittanullu tunisinermut atatillugu inatsisilerituumik arlaannut attuumassuteqanngitsumik misissuisoqarnissaanik siunnersuut ilaleqqullugu.
Ullumi pingasunngornermi oktoberip 24-ianni Demokraatit sinnerlugit Inatsisartunut ilaasortap Jens B. Frederiksenip inassut tamanna tunuliaqutaralugu Inatsisartunut aalajangigassatut siunnersuutiginiarpaa apeqqut pineqartoq inatsisilerituunit arlaannut attuumassuteqanngitsunit nalilerneqassasoq.
Taamaasiornikkut NUSUKA-p inatsisartut sakkortunerpaamik inappai siunnersuut isumaqatigiillutik ilaleqqullugu.
- Inuiaqatigiit inatsisitigut illersugaasut tunngaviusumik periusigaat kikkut tamarmik inatsimmi assigiisinneqassasut. Minnerpaannguamilluunniit pasinartoqarpat inuit aalajangersimasut uagut atitsinni iluanaartitaasimasut inatsisartut pisussaaffigaat ilimagisap qisuariarfigineqarnissaa, Ole Aggo Markussen, NUSUKA-mi pisortaasoq oqarpoq.
- Demokraatit siunnersuutaat Inatsisartut ullumi ilalinngippassuk inatsisartut nuanniitsumik ima inississavaatigut, immikkoortoqarfinni aningaasaatitsinnik paarsititsiffitsinni peqquserluttoqartartoq.
- Tamanna inatsisartut tusaanngitsuusaaginnarsinnaanngilaat, pineqartoq taamak erloqinartigisoq, Ole Aggo Markussen oqarpoq.