Aqqusinertigut angallannermut inatsit isumannaatsoq

Biilertilluni mobiltelefuunikkut oqaluussisoqartarunnaassaaq.

Tamatta taamaattunik misigisaqartarsimagunarpugut:

Biilit nalunaaquttap akunneranut 60 kilometerersorlutik saneqqutipiloortut - biilertoq mobiltelefuunikkuut oqaluussiitigaluni:

Saamimminik biili aquutigalugu, talerpimminik mobiltelefuuni tigummillugu, illarasaarneratigut takuneqarsinnaalluni biilernini - aqqusinertigut angallannermut inatsimmii piumasarineqartutut - tamakkiisumik eqqummaariffiginngikkaa.

Biilernerulli mobiltelefuunillu ulorianartumik akuleriissinneqartarnerat aappaagumiit ajornarsissaaq.

Kalaallit Nunaanni aqqusinertigut angallannermut inatsisissaq, Inatsisartut novemberip arfineq aappaanni oqaluuserisassaat inatsiseqarnermullu ministerip Lene Espersenip Folketingimi saqqummiussassaa, iluaqutigalugu biiliitigaluni mobiltemefuunikkut oqaluussisarneq inerteqqutaalissaaq.

Aqqusinertigut angallanneq isumannaatsoq
Inatsit 1992-imeersoq taarserlugu aqqusinertigut angallannermut inatsisitaassami Kalaallit Nunaanni aqqusinertigut angallannermi isumannaatsuuneq sutigut tamatigut sukateriffigineqassaaq.

Aqqusinertigut angallannermut inatsisitaassami qamuteralannut tunngatillugu qamuteralannik ingerlatsisinnaasut ukiui 16-iniit 18-inut qaffanneqassapput, qamuteralaallu normulersorneqartalissapput.

Biilinut tunngatillugu inatsisip nutaap kingunerisaanik ujatsiutaasat peqqussutaalissapput, meeqqallu mikisut biilimi immikkut ittunik issiaveqartalissapput.

Inatsimmilu aamma niaqorornaveeqqutinut tunngasut sukateriffigineqarsimapput:

Qamuteralattartut siunissami niaqorornaveeqqutinik, knallertinut motorcykelinullu peqqussutaareersunik atortoqartalissapput.

Siunissamilu aamma qamuteralannut motorcykelinulluunniit ilaasut arfineq pingasut sinnerlugit ukiullit niaqorornaveeqquteqartalissapput.

Nuummi illoqarfinnilu anginerni allani ullaakkut suliartukaaffiup ualikkullu angerlakaaffiup nalaani angallattorpassuaqartarpoq, minnerunngitsumik bussit malugilluartagaannik.

Aqqusinertigut angallannermut inatsisit nutaaq atorlugu bussinik ingerlatsisartut iluaqutissinneqarput.

Siunissami biilertut bussit unittarfii bussinit uninngaffigineqartut qanillileraangamikkit kigaallattalissapput, bussit akornguteqanngitsumik aallartarsinnaaniassammata.

Aqqusinertigut angallannermi inatsimmi nutaami aamma biilit ingerlaartillutik qanittumut qulliminnik ikumatitsisarnissaat peqqussutaalissaaq.

Biili arsaarinnissutigineqassaaq
Imigassartorsimalluni biilertarneq inatsimmi nutaami arlalitsigut sukateriffigineqarpoq.

Imigassartorsimalluni biilernermut killissarititaasoq 1,20 promilleniit 0,5 promillinut appartinneqarpoq.

Promillekørsleimillu oqartarneq atorunnaarsivinneqarpoq.

Biilertartut ukiup ataatsip ingerlanerani imigassartorsimallutik biilerlutik tigusarineqarsimappata - taava politiit biilersinnaanermut allagartaannaanngitsoq kisiannili aamma biili tigusalissavaat.

Arsaarinnissutigalugu.

Inatsit atuuttuartussaq
Kalaallit Nunaanni aqqusinertigut angallannermut inatsisissamut nutaamut siunnersuut illoqarnermut attaveqarnermullu naalakkersuisup Kim Kielsenip, Siumut, saqqummiutissavaa.

- Eqqaamassavarput aqqusinertigut angallannermut inatsimmi aqqusinertigut angallattunik allanik mianerinnittumik allanillu eqqarsaatiginnittumik ingerlasarnissarput tunngavigineqarmat, Kim Kielsen oqarpoq.

Taamaalillunilu aamma aqqusinertigut angallannermi inatsit allatiguttaaq immitsinnut pissusilersorfigeqatigiittarnitsinnut sunniuteqartassaaq.

Kim Kielsenilli aamma erseqqissaatigaa, aqqusinertigut angallannermi inatsit malinneqarpat aatsaat aqqusinertigut angallanneq isumannaannerulersinnaammat.

Taamatullu oqarluni inatsisinik atortitsinermut ministeri Lene Espersen kajumissaarpaa Kalaallit Nunaanni politiit pisariaqartunik aningaasaliiffigeqqullugit, taakku inatsisip atortinnissaanut naammattunik aningaasassaqaqqullugit.

Sulili nalunarallarpoq inatsiseqarnermut ministerip Lene Espersenip qaqugu Kalaallit Nunaanni aqqusinertigut angallannermi inatsisissaq nutaaq Folketingimi saqqummiukkumaarneraa.

Qamuteralaat uku Kalaallit Nunaanni aqqusinertigut angallannermi inatsisissanut nutaanut piareersimapput, tassani ilaasut arfineq pingasut sinnerlugit ukiullit niaqorornaveeqquteqartarnissaat piumasarineqarmat.

Powered by Labrador CMS