PIP Nanortalik kommunianik suliassanngortitsinermini ajorsarpoq
Nanortaliup kommuniat meeqqat inuusuttullu pillugit inatsisartut peqqussutaannik unioqqutitsinngilaq. Tamanna perorsaasut kattuffiata PIPp suliassanngortissimasaani Østre Landsretip Københavnimi naqissuserpaa. Suliami pineqarpoq, Niviarsiaraq imminornissamik navianartorsiortoq pillugu kommunip naammaginanngitsumik ikorsiiniarsimanera.
Eqqartuussut tallimanngormat oqaatigineqarpoq - Østre Landsretip taamaatut aalajangiinermigut Kalaallit Nunaata Eqqartuussiviata 2007imi juulimi eqqartuussutaa akerlilerpaa.
Østre Landsretip pingaartissimavaa kommunip ikiorsiissutissaq niviarsissap inuusuttup pisariaqartitaanut pitsaanerpaajusussaq neqeroorutigisimagaa.
Suliami pineqarpoq niviarsiaraq pissusilersuutimigut ajornartorsiortoq imminoriaraluarsimasoq - aammalu atuarfimmi psykologiusoq naapertorlugu imminornissaminut suli navianartumiittoq.
Niviarsiaqqap arnaata meeqqap Danmarkimi efterskolernissaa soqutigisimavaa. Kisianni siunnersuut taanna kommunip itigartissimavaa, isumaqarami eftyerskolertitsinissaq akisuallaartoq. Taamaattumik kommunip aallaqqaammut ilaqutariinnik sapaatip akunnikkaartumik oqaloqatiginnittarnissaq neqeroorutigisimavaa.
Suliaq perorsaasut ilinniarsimasut kattuffiannit PIPmit niviarsiaqqap anaanaa sinnerlugu suliakkiissutigineqarpoq. Kattuffiup suliaq taanna suliassanngortippaa suliani taamaattuni kommunip akisussaaffiata maluginiarneqarnissaa anguniarlugu.