Utaqqineq naalakkersuisut sivikilliniarpaat
Isumaginninnermi Maalaartarfimmut maalaarutit suliarineqarnissaannut piffissaq sivisuallaaq atorneqartarpoq, tamannalu Naalakkersuisut qanoq iliuuseqarfiginialerpaat.
Tamanna inatsisartunut ilaasortap Lene Knüppelip (Demokratit) apeqquteqaataanut akissummi erserpoq, tassa isumaginninnerup iluani aalajangiussaq pillugu maalaaruteqaraanni akissutissamik utaqqineq agguaqatigiisillu qaammatinik 24-nik sivisussuseqartartoq, tassa ukiut marlorsuit.
-Tamanna suliamik ingerlatsineruvoq akuerineqarsinnaanngitsoq, taamak naalakkersuisut siulittaasuat Lene Knüppelimut akissummini allappoq.
Naalakkersuisut isumaqarpugt qaammatipo ataatsip qaammatillu arfinillit akornanni utaqqisarsinnaaneq akuersaarneqarsinnaasup iluaniittoq.
Maalaarutit aalajangiiffigineqarnissaminnik utaqqisut ukioq manna septembarip aallaqqaataani 497-iupput. Maalaartarfiup 2006-imi suliassat 338-t tigusimavaat.
Maalaartarfiup nalilerpaa inatsisilerituunut pingasunut allaffimmiumullu ataatsimut suliassaqartitsisuusut. Ullumikkut Maalaartarfimmi sulisut pingasuupput, taakkunannga inatsisileritooq ataaseq.
Naalakkersuisut maanna Maalaartarfiup siulittaasortaavanik ataatsimeeqateqarniarput, sulianik ingerlatsisarnerup sivikinnerulersinneqarsinnaaneranik aaqqiissutissarsiniarlutik, assersuutigalugu inatsisilerituunik ikiortissarsiornikkut.